Birqatar buqaralyq aqparat quraldarynyń basshylary men ókilderin bas qosqan jıynda óńirlik baspasózdi damytý, salada týyndap otyrǵan máseleler jáne jýrnalıstıkanyń zamanaýı talaptary syndy máseleler negizgi áńgime ózegine aınaldy.
Sharada alǵashqy bolyp sóz alǵan «Qazaqstan Taraz» telearnasynyń dırektory, belgili jýrnalıst Meırambek Tólepbergen aımaq jýrnalıstıkasynyń ótkeni men búginine keńinen toqtalyp, qazirgi zaman talaby – aqparatty jedel ári sapaly taratý ǵana emes, sondaı-aq kópshiliktiń qyzyǵýshylyǵyn dál taýyp, oqyrmanmen baılanys ornata bilý ekenin aıtty. Sonymen qatar, ol aqparattyq salaǵa aıryqsha mańyz berý kez kelgen zamanaýı memlekettiń kókeıtesti máselesi ekendigin áńgimelep, buqaralyq aqparat quraldaryn damytýǵa qatysty birqatar ózekti máselelerdi alǵa tartty.
Jambyl oblystyq «Znamıa trýda» gazetiniń bas redaktorynyń orynbasary Kóken Orshabekov sońǵy ýaqytta basylymdar taptaýryn úrdisten alshaqtap, jańashyldyqqa umtylyp, shyǵarmashylyq izdenis ústinde ekendigin tıek etip, óńirde orystildi mamandarǵa degen tapshylyq sezilip otyrǵandyǵyn aıtty. Jas jýrnalısterdiń kásibı bilimin shyńdap, tanymdyq kókjıegin arttyrý jaıyn «Jambyl – Taraz» gazetiniń dırektor-bas redaktorynyń mindetin atqarýshy Erman Ábdıev qaýzady.
– Jastardy jýrnalıstıkaǵa tartý, olardy yntalandyryp, aqparattyq qoldaý kórsetý bizdiń ujymnyń basty nazarynda. Áýlıeata óńiri jýrnalıstıkasynda biz aǵa býyn men jas tolqynnyń arasyndaǵy baılanystyń arta túsýine árdaıym nıettimiz. Osy taqilettes jıyndar dástúrge aınalyp, oǵan tek aǵa býyn jýrnalıster ǵana emes, aldaǵy ýaqytta jas tilshiler de tartylsa degen tilegimiz bar, – dep atap ótti E. Ábdıev.
Sondaı-aq, basqosý barysynda respýblıkalyq «Habar» telearnasynyń Jambyl oblysyndaǵy menshikti tilshisi Nurjan Mergenbaı, respýblıkalyq «Kazahstanskaıa pravda» gazetiniń aımaqtaǵy menshikti tilshisi Mıhaıl Te, «Araı» jastar gazetiniń bas redaktorynyń orynbasary Tursynbek Sultanbek jáne ózge de jıynǵa qatysýshylar taqyryp tóńireginde paıymdy pikirlerin bildirip, keleli oılarymen bólisti.
Dóńgelek ústel sońynda ınstıtýt rektory Darııa Qojamjarova qurylǵanyna bıyl elý jyl tolyp otyrǵan oqý ornynyń baǵyndyrǵan belesteri men keleshek josparlary jaıynda áńgimelep, búginde mass-medıa zamanaýı memleket damýynyń negizgi kórsetkishine aınalyp otyrǵandyǵyn aıtty.
– Jýrnalıster eńbeginiń mańyzdylyǵynyń qandaı ekendigi kóziqaraqty azamattardyń barshasyna belgili. О́ıtkeni, gazet materıaldary, tele jáne radıo baǵdarlamalary qoǵamdyq pikir men qundylyqtardy qalyptastyrady. Bizdiń jemisti yntymaqtastyǵymyz aldaǵy ýaqytta da ádettegideı salıqaly ózara tıimdi qarym-qatynasta bolatynyna senimim kámil. Taraz memlekettik pedagogıkalyq ınstıtýtynyń qyzmetin jan-jaqty kórsetýdegi qoldaýlaryńyz ben kásibı sheberlikterińiz úshin alǵysymdy bildiremin, – dedi D. Qojamjarova.
Sonymen qatar, ınstıtýt basshysy bir top jýrnalısterdi «Taraz memlekettik pedagogıkalyq ınstıtýtynyń 50 jyldyǵy» merekelik medalimen marapattap, syı-sııapat kórsetti.
– Qazirgi kúnde baılanys pen aqparat kúndelikti ómirimizdiń barlyq salasyna dendep enip, aınymas bólshegine aınaldy. Álbette, «aıshylyq alys jerlerden jyldam habar alǵyzǵan» olardyń róli qaı kezeńde de, qaı ýaqytta da erekshe ról atqarǵany málim, dese de 21 ǵasyrda mańyzdylyǵy aıryqsha arta tústi. Osy oraıda jalpy jýrnalıstıkanyń máselesi bir tóbe de, aımaqtyq jýrnalıstıkaniki bir tóbe ekendigin aıtqan lázim. Pedagogıkalyq oqý orny jambyldyq jurtshylyqtyń «kózi, qulaǵy hám tili» bolyp júrgen óńirlik baspasózdi odan ármen damytý jaıyn qaýzaıtyn jıyndardy túrli taqyryp aıasynda uıymdastyryp, jýrnalıst qaýymynyń basyn qosyp otyrýdy dástúrge aınaldyrýdy kózdep otyr, – deıdi TarMPI-dyń aqparattyq-ımıdjdik qyzmetiniń jetekshisi Jandar Asan.
