Mamandardyń aıtýynsha, sońǵy jyldary qaldyqtardy qalpyna keltirý máselesin jolǵa qoıýǵa basa nazar aýdarylyp keledi. Máselen, bir ǵana Almaty qalasy men Almaty oblysynda jylyna 20 myń dóńgelek jaramsyz qalady. Onyń 70 paıyzy jeńil kólikter dóńgelegi bolsa, qalǵan 30 paıyzy júk kólikterine tıesili. Bul óz kezeginde túrli zııankesterdiń kóbeıýi men qorshaǵan ortanyń lastanýyna ákelip soǵady. Muny boldyrmaýdyń jalǵyz joly – isten shyqqan materıaldardy qaıta óńdep basqa da jumystarǵa paıdalaný. Ázirge 30 adamdy jumyspen qamtyp otyrǵan zaýyttyń alǵashqy aıaq alysy jaman emes. Aldaǵy ýaqytta aýqymyn keńeıtip, óndiristik qýatyn eki esege deıin arttyrýdy kózdep otyr.
– Qazir qala men oblys aýmaqtaryn aralap eski, jaramsyz dóńgelekterdi jınaýmen aınalysyp kelemiz. Barlyq azamattardy osy bastamany qoldaýǵa shaqyryp, isten shyqqan dóńgelekterin zańdy qujat boıynsha bizge ótkizýlerin suraımyz. Damyǵan memleketterde jaramsyz qaldyqtardy arnaıy mekemelerge ótkizý úshin azamattar aqsha tóleıdi. Biz tegin qabyldaımyz. Qaı jerden bolsa da dóńgelekterdi ózimiz alyp ketemiz. Qury qoqysqa aınalyp jatqansha ıgilikke jaraǵany jaqsy ǵoı. Bizden shyqqan ónimder balalar alańynyń tósenishine, gazondardyń astyńǵy qabatyna tóseýge, sondaı-aq untaqtalǵan shınalar basqa elderdiń tájirıbesindegideı tas joldardyń quramyna qospa retinde qosylady. Qazirgi tańda elimiz atalǵan qospany Reseıden ımporttap otyr, – deıdi «Q-Recycling» shına óńdeý zaýytynyń dırektory Jasulan Saıkatov. Mamandar kórshi elden ımporttalatyn ónimniń tonnasy 120 myń teńge bolsa, ózimizde óndiriletin ónimniń tonnasy 80 myń teńge bolatynyn aıtady.
Búgingi tańda el aýmaǵynda jaramsyz dóńgelekterdi qaıta óńdeýmen aınalysatyn 10 ǵa jýyq zaýyt bar. Almaty aýmaǵynda boı kótergen jańa zaýyt oblystaǵy shına óńdeıtin tuńǵysh zaýyt bolyp otyr. Jalpy quny 150 mln teńgeni quraıtyn óndiris oshaǵy jeke ınvestorlardyń qarjylandyrýymen iske qosylǵan.
Arman OKTIаBR,
«Egemen Qazaqstan»
ALMATY
