Oıynnyń alǵashqy mınýttarynan-aq alǵa umtylǵan «Astana» fýtboshylary alań ıeleri qaqpasyna jıi shabýyldaǵanymen, gol soǵa almady. Osy rette, óz qaqpasyn 100 paıyzdyq goldan aman saqtap qalǵan «Spartak» klýbynyń qaqpashysyn erekshe atap ótken jón. Bul qaqpashy bolmaǵanda elordalyq klýb kelesi kezeńniń máselesin birinshi taımda-aq sheship qoıatyn edi. Degenmen birinshi 45 mınýtta esep ashylmady.
Ekinshi taımda alań ıeleri belsendilik tanyta bastady. «Astana» da sáti túskende esep ashýǵa tyrysty. Oıynnyń 73-mınýtynda qarsylas klýbtyń qaqpasy mańynda aıyp soqqysyn oryndaǵan Patrık Tvýması áýelete pas berýdiń ornyna, jaqyn buryshqa soqqy jasap, esepti ashty. Bul esep oıyn sońyna deıin saqtalyp, «Astananyń» jeńisimen aıaqtaldy.
Sońǵy eki eýromaýsymda Chempıondar lıgasy men Eýropa lıgasynyń toptyq kezeńinde oınap, tájirıbe jınaqtaǵan astanalyqtar úshin ekinshi kezeń matchtary qıyndyq týǵyzbaýy tıis edi. Onyń ústine, bul kezeńdegi qarsylasyn azýly dep aıta almaımyz. Latvııalyq «Spartak» Chempıondar lıgasyna óz tarıhynda tuńǵysh ret qatysyp otyrǵanyn da aıta ketken jón.
Matchtan keıingi baspasóz máslıhatynda «Astana» klýbynyń bas bapkeri Stanımır Stoılov alańnyń sapsy oıynǵa keri áser etkenin aıtady. «Alańǵa oıyn bolatyn kúni sý shashylmaǵany men úshin de «tosynsyı» boldy. Eki kún osynda daıyndaldyq, kúnde sýarylǵan, dop ornymen domalap júrdi. Búgin tańerteń ǵana alańǵa sý shashylmaıtynyn aıtty. Ony kim oılap tapqanyn bilmeımin, biraq oıyn deńgeıi birden 40%-ǵa túsip ketti. Alań doptyń jyldam qozǵalysyna kedergi keltirdi. Kúnde sýdy quıyp turyp, búgin nege sýarmaǵanyn men de túsinbedim. Bul da ádemi oıynǵa kedergi keltiretin kishkene sebepterdiń biri», deıdi ol.
Aıta keteıik, qos komanda arasyndaǵy qarymta oıyn 18 shilde kúni «Astana Arena» stadıonynda ótedi.
Álı BITО́RE,
«Egemen Qazaqstan»
