Jıynda sóz sóılegen Elbasy Nursultan Nazarbaev osydan 25 jyl buryn, 1992 jyldyń 13 shildesinde Ulttyq qaýipsizdik komıtetiniń qurylýymen elimizdiń qaýipsizdigin qamtamasyz etetin berik júıe qalyptasqanyn atap ótti.
– Sizder Otanymyzdyń tutastyǵyn qamtamasyz etýge, táýelsizdikti nyǵaıtýǵa jáne halqymyzdyń tynyshtyǵyn saqtaýǵa 25 jyldyń ishinde eleýli úles qostyńyzdar. Arnaýly qyzmettegi adamdardyń bári, quqyq qorǵaý organdary, áskerıler, sonyń ishinde sizder de kózge kórinbes maıdanda kún-tún demeı, el úshin abyroıly da jaýapty jumys atqaryp kele jatyrsyzdar. Osy jyldar ishinde Ulttyq qaýipsizdik komıteti kóptegen qaýiptiń aldyn alyp, talaı lańkestik áreketterdiń jolyn kesti. Bul jumysqa biliktiligi men daıarlyǵy joǵary, bilimi bar, sezimi bar, otansúıgish júregi bar adamdar ǵana qabyldanady. Olar alańsyz ári adal qyzmet etýi úshin memleket tarapynan da barlyq jaǵdaı jasalǵan, – dedi Elbasy.
Qazaqstan Prezıdenti elimizde beıbitshilik pen turaqtylyqty saqtaý úshin óz ómirin qurban etken UQK qyzmetkerleriniń eńbekterin erekshe atap ótip, olardy bir mınýt únsizdikpen eske alýǵa shaqyrdy.
Memleket basshysy Dostastyq elderiniń qaýipsizdik organdarynyń jetekshilerine Qazaqstandaǵy áriptesterimen tyǵyz baılanys ornatyp, ózara jemisti is-qımyl jasap kele jatqany úshin alǵys aıtty.
Qazaqstannyń táýelsizdik jyldaryndaǵy jetistikterine toqtalǵan Prezıdent Qazaqstannyń álemdik qoǵamdastyqtaǵy bedeli de artyp kele jatqanyn, bıyl elimizdiń Birikken Ulttar Uıymynyń Qaýipsizdik Keńesine turaqty emes múshe bolýy sonyń bir kórinisi ekenin jetkizdi.
– Bizdiń aldymyzda áli de aýqymdy mindetter tur. Elimizdiń básekege qabilettiligin arttyrý úshin barlyq salany jańǵyrtý júrgizilip jatyr. «Qazaqstan-2050» Strategııasyn iske asyrýdamyz. Onyń maqsaty – álemniń ozyq damyǵan otyz eliniń qataryna ený. Biz sıfrlandyrý álemine enip, dúnıe júziniń barlyq elderinde ótip jatqan tehnıkalyq progreske ilese alýymyz qajet. Bul – kúrdelirek mindet jáne burynǵy jańǵyrýǵa uqsamaıtyn múlde basqa deńgeı. Sondyqtan barynsha jumys isteýge týra keledi. Aldaǵy maqsatqa tabysty qol jetkizýdiń basty kilti – tóńiregimizde beıbit ómir men tynyshtyqty qamtamasyz etý, ishki saıası turaqtylyq pen kelisimdi ornatý, – dedi Nursultan Nazarbaev.
Elbasynyń aıtýynsha, álemniń qazirgi barlyq syn-tegeýrinderi men qaýip-qaterlerine qarsy turý úshin UQK qyzmetkerleriniń kásibı qabileti men biliktiligin jetildirý qajet.
– Jyl basynda Ulttyq qaýipsizdik komıteti men onyń vedomstvolarynyń jańa qurylymy bekitildi. О́zara is-qımyl jasaý men kúsh-qýatty qaıta ornalastyrýdyń jańartylǵan júıesi meılinshe tıimdi jumys júrgizýge múmkindik beredi. Ulttyq qaýipsizdik komıtetiniń qyzmetkerleri aldaǵy ýaqytta da Otanymyzǵa minsiz qyzmet etip, elimizdi kórkeıtý jáne ulttyq múddemizdi qorǵaý jolynda ózderiniń barlyq kúshin, bilimi men tájirıbesin jumsaıtynyna senimdimin, – dep sózin túıindedi Prezıdent.
Sońynda Elbasy qyzmettik paryzyn oryndaýda erlik pen jankeshtilik kórsetken ulttyq qaýipsizdik organdarynyń úzdik qyzmetkerlerine memlekettik nagradalar tabys etti.
II dárejeli «Aıbyn» ordenimen «A» arnaýly maqsattaǵy qyzmetiniń ortalyq nusqaýshysy, maıor, marqum Erǵanat Kósherbaev nagradtaldy jáne osy ordendi UQK 2-shi departamentiniń basqarma bastyǵy, maıor Ámir Saryqulov keýdesine taqty. Al «Jaýyngerlik erligi úshin» medalimen UQK qyzmetkerleri – D.Bazarbaev, A.Qojabekov, A.Luqpanov, J.Omarıev, Á.Tastambekov, E.Úsenov marapattaldy.
Marapattaý rásiminen keıin Ulttyq qaýipsizdik komıtetiniń 25 jyldyǵyna arnalǵan saltanatty konsert ótip, osy salanyń tarıhy men qazirgi sátterin beıneleıtin derekti fılm kórsetildi.
Qatysýshylar lebizi
Bolat ZÁKIEV,
Ulttyq qaýipsizdik komıtetiniń ardageri:
– Bir eldiń tarıhynda 25 jyl degen qysqa merzim. Biraq ár mekemeniń óz salasyndaǵy jetken jetistikteri ýaqytpen ólshenbeıdi. Qazaqstannyń Ulttyq qaýipsizdik komıtetiniń shırek ǵasyr ishinde atqarǵan jumystary aýyz toltyryp aıtarlyqtaı. Arnaýly memlekettik organ elimizdegi tynyshtyq pen turaqtylyqty saqtaýda eleýli eńbek etip keledi.
Men 41 jyl boıy osy salada jumys istedim. Sonyń 15 jylynda Shekara qyzmetin basqardym. Sondyqtan osy sala maǵan jaqynyraq. 1992 jyly Qazaqstannyń Shekara qyzmeti qurylǵan kezde biz Qytaımen shektesetin 1600 shaqyrym jerdi ǵana kúzetip otyrdyq. Sodan beri elimizdiń shekarasyn, ıaǵnı 15 myń shaqyrymdy kúzetý úshin kóptegen jumys atqaryldy. Mysaly, shekara beketterin salý, olardy bilikti kadrlarmen qamtamasyz etý, zańdardy qabyldaý ári kórshi eldermen beıbit baılanys ornatý sekildi kóptegen sharýalar eńserildi.
Osy oraıda, rýhy myqty, júreginde otansúıgishtik sezimdi uıalatqan Ulttyq qaýipsizdik komıteti qyzmetkerleriniń arqasynda osyndaı tolaıym tabystarǵa qol jetkizdik. Bul salada kileń elin súıgen mamandar jumys isteıdi. Olar ómirin qaterge tige júrip, elimizdiń turaqtylyǵy men tutastyǵyn adaldyqpen qorǵaı bildi. Áriptesterimniń erlikke para-par eńbegi rasymen de elenýge turarlyq. Arnaýly memlekettik qyzmettegi barlyq azamatty kásibı merekesimen quttyqtaımyn. Olardyń eńbekterine tabys tileımin. Halqymyz aman, elimiz tynysh bolsyn!
Ámir SARYQULOV,
II dárejeli «Aıbyn» ordeniniń ıegeri:
– Ulttyq qaýipsizdik komıtetiniń qurylǵanyna 25 jyl tolýyna oraı Elbasynyń qolynan memlekettik marapat alyp jatqanyma shyn júrekten qýanyshtymyn. Mundaı marapat maǵan burynǵydan da úlken jaýapkershilik júkteıdi. О́zim 2000 jyldan beri qaýipsizdik salasynda jumys isteımin. Sodan beri arnaıy organnyń qyzmetine degen Elbasynyń qoldaýyn árdaıym sezinip kelemiz. Qazirgi tańda Ulttyq qaýipsizdik komıtetiniń qaýip-qaterge qarsy turýǵa qaýqarly barlyq qajetti resýrstary men qural-jabdyqtary bar. Prezıdenttiń bastamasymen arnaıy memlekettik baǵdarlama da qabyldanyp, júzege asyrylyp keledi. Sonyń nátıjesinde ınfraqurylymdy damytý, materıaldyq-tehnıkalyq bazany jańǵyrtý, qyzmetkerlerdiń áleýmettik jaǵdaıyn jaqsartý baǵytynda kóptegen jumystar atqarylýda. Demek, bizdiń alańsyz jumys isteýimizge barlyq jaǵdaı bar deýge bolady.
Qazirgi jahandyq jaǵdaıda kúlli álemniń aldynda kóptegen syn-qaterler tur. Osyndaı synaq kezinde biz elimizdi tıisti deńgeıde qorǵap, qaýip-qater týyndaǵanda shuǵyl áreket ete alýymyz kerek. Ári Elbasy Ulttyq qaýipsizdik komıteti qyzmetkerleriniń aldyna úlken mindetter júktep, ásirese, kıberqylmystyń aldyn alýdy, oǵan tosqaýyl qoıyp, «Qazaqstannyń kıberqalqany» júıesin qalyptastyrýdy tapsyrdy. Biz osyndaı aýqymdy mindetterdi adal atqaryp, Otanymyzǵa qyzmet etýge árdaıym daıynbyz!
Qymbat TOQTAMURAT,
«Egemen Qazaqstan»
Cýretter Prezıdenttiń baspasóz qyzmetinen alyndy
