Keshe Astanada ótken saýda-ekonomıkalyq yntymaqtastyq jónindegi Qazaqstan-Germanııa úkimetaralyq jumys tobynyń 11-shi otyrysynda da eki el arasyndaǵy qarym-qatynastyń jaı-kúıi jan-jaqty talqylandy. Bul basqosý Germanııa Federatıvtik Respýblıkasynyń Prezıdenti Frank-Valter Shtaınmaıerdiń elimizge resmı sapary aıasynda uıymdastyryldy. Otyrysqa elimizdiń Investısııalar jáne damý vıse-mınıstri Erlan Haırov jáne GFR Ekonomıka jáne energetıka federaldy mınıstrliginiń syrtqy ekonomıkalyq saıasat departamentiniń dırektory Eghart Frans tóraǵalyq etti.
Jumys toby otyrysynda saýda-ekonomıkalyq jáne ınvestısııalyq yntymaqtastyq máseleleri qaraldy. Máselen, energetıka salasy boıynsha tıimdilik, qorshaǵan ortany qorǵaý jáne jasyl ekonomıka, shıkizat, ónerkásip jáne tehnologııa, bilim, týrızm, ınfraqurylym sapasy, kólik logıstıkasy, aýyl sharýashylyǵy, taǵy basqa máseleler talqylandy. Sondaı-aq, Ekonomıkalyq damý jáne yntymaqtastyq uıymy komıtetterimen jumys aıasyndaǵy yntymaqtastyq jaıyna nazar aýdardy.
Vıse-mınıstr Erlan Haırov óz kezeginde Germanııanyń energııalyq tıimdilik pen energııa únemdeý boıynsha álemdik kóshbasshy ekenin atap ótti. Jańǵyrmaly energııa kózderi men Germanııanyń mamandandyrylǵan EKSPO-2017 halyqaralyq kórmesine belsene qatysýy eki eldiń bolashaqtaǵy ózara is-qımylynyń perspektıvalary men joǵary deńgeıin aıǵaqtaıtynyn jetkizdi. Al sheteldikter Qazaqstannyń ınvestısııalyq ahýalynyń zor áleýetin aıtyp, qyzyǵýshylyqtaryn jetkizdi.
Qos tarap Germanııanyń ozyq tehnologııasy men bilimin jáne tájirıbesin qoldanýǵa baǵyttalǵan ekonomıkalyq ózara is-qımyldy damytý máselelerin aıryqsha atady. Negizinen, biz úshin nemis tehnologııasy, taýary qashanda sapaly, únemdi bolady degen túsinik burynnan qalyptasqan. Al nemister ózderi týraly qalyptastyrǵan bul «brendterin» qazirgi kúni de joıǵan joq. Árıne, Germanııadan úırenerimiz kóp. Sol sebepti de elimiz Germanııa sııaqty alpaýyt elmen senimdi seriktes bolýǵa múddeli.
Elderdiń saýda-ekonomıkalyq baılanysynyń sátti shyqqan úlgisi retinde Investısııalar jáne damý mınıstrligi men Germanııanyń «DENA» energetıkalyq agenttigi arasyndaǵy Qazaqstanda energetıkalyq servıstik naryqty damytý modelin ázirleý jónindegi yntymaqtastyǵyn aıryqsha aıtýǵa bolady. Sondaı-aq, «Qazaqstannyń ındýstrııany damytý ınstıtýty» AQ pen Germanııanyń Fraýngoffera ınstıtýty arasyndaǵy «Indýstrııa 4.0» tehnologııasyn engizý salasy boıynsha Qazaqstan ónerkásibin sıfrlandyrý yntymaqtastyǵy da tıimdi júzege asýda. Germanııalyq seriktestermen shıkizat, ónerkásip jáne tehnologııa salalaryndaǵy seriktestik týraly úkimetaralyq kelisim aıasynda da qolǵa alynǵan birqatar jobalar bar. Aıtalyq, qazaqstandyq 3 sement óndirý zaýytynda júzege asqan «HeidelbergCement» kompanııasynyń jobalaryn, «Qazgeologııa» AQ pen «Ulmus Fund» kompanııasynyń Qaraǵandy oblysyndaǵy mys, túrli-tústi jáne qymbat metaldardy birlesip barlaý jobasy, Jambyl oblysyndaǵy jobalyq qýattylyǵy jylyna 5100 kg altyn quımasyn jáne basqa da metaldar óndiretin «Aurum Deutschland» JShS ken metallýrgııalyq kombınaty men altyn ken ornyn ıgeretin qurylys jobalaryn mysalǵa keltirýge bolady.
Qazaqstan-Germanııa Iskerlik keńesi turaqty túrde jumys isteýde. Qazirdiń ózinde germanııalyq ınvestorlardyń qatysýymen 2020 jylǵa deıin jalpy qýaty 189 MVt bolatyn jańǵyrmaly energııa kózderi jóninen 5 jobany júzege asyrý boıynsha jumystar júrgizilip jatyr. Al kezekti otyrystyń qorytyndysynda 872 mln eýro somasyndaǵy 21 qujatqa qol qoıyldy.
Dınara BITIK,
«Egemen Qazaqstan»
