Sandyqtaýdan jetken sarqyt

Sóz basynda tusaýy jańa kesil­gen fılmniń sıýjettik jelisi týraly az-kem baıandaıtyn bolsaq, negizgi oqıǵalar Astanada jáne el­or­daǵa jaqyn aýyldardyń birinde óte­di. Astanada turatyn qaltaly aza­mattardyń biri jańa úı satyp alady. Súıikti jary, boıjetken qyzy bar otaǵasy qazaqtyń jón-jo­ralǵysyn saqtap, qonystoıǵa aýyl­daǵy týǵan-týys, qurby-qur­dastaryn shaqyrady. Biraq olar aýyldaǵy aǵaıyndar Astanaǵa taı­ly-tuıaǵy qalmaı, shubyryp keledi dep kútpese kerek?! Qysqasy, qala men aýyl halqynyń turmys-salty, mentalıteti toǵysqan tus­ta­ǵy qaıshylyqqa toly qyzyqty oqı­ǵalar, qýanyshty sátter fılm sse­narııine arqaý bolypty. Aýyl men qala jastarynyń arasynda tutanǵan sezim arqyly mahabbat taqyryby qamtylǵan. Bul bir qa­ra­ǵanda taptaýryn sıýjet, jattan­dy ssenarıı bolyp kórinýi múmkin. Alaıda ózimiz kúnde kýá bolyp júrgen jaıttardy, problemalardy kıno tilimen kúldire otyryp sóıletkende, eriksiz ezýimizge kúl­ki úıirildi. Onyń ústine, qazaq kı­no­synyń qory komedııalarǵa baı dep te aıta almasymyz taǵy bar. Bul oraıda, ssenarıı avtory Narǵyz Irsalıevanyń eńbegin atap ótken jón.

Fılmde basty rólderdi som­daǵan Qazaqstannyń eńbek si­ńir­gen qaıratkeri Túımehan Atym­ta­eva, M.Áýezov atyndaǵy Qazaq mem­lekettik akademııalyq drama teatrynyń akterleri Aqysh Omar, Maıra Omar, Gúlbarshyn Qy­lysh­baı, taǵy basqalary óz ról­de­rin sheber somdap shyqty deýge bolady. Inabat Ábenova, Dastan Baıbosynov, Jeńis Ábdiǵazın, Saǵyndyq Toqpaev, Erǵulan Jan­peı­isov syndy jastar da aǵa býyn­nyń tasasynda qalmaýǵa tyrysyp baqqany baıqalady. Iаǵnı, re­jıs­seri Elena Shestakova men bas pro­dıý­seri Elena Gomerdiń jas akterler­ge artqan senimi aqtalǵan.

– Biz aqjarqyn minezimen qala tur­ǵyndarynyń júregin jaýlap, jan dúnıesin baýrap alǵan aýyl adamdaryn kórsetkimiz keldi. Men ózim Aqmola oblysy, Sandyqtaý aýdany, Balqash aýylynyń týmasymyn, bul óńir halqynyń minez-qulqyn jaqsy bilemin. Bul jaqtyń tabıǵaty ásem, adamdary baýyrmal, shynaıy. Jańa fılm arqyly ózim týyp-ósken jerdiń ný ormanyn, kógildir kólderin kórermenge kórsetip, qyzyqtyrýǵa tyrystym. Kórermenderdiń kórsetilimnen keı­ingi kóterińki kóńil-kúıine qa­raǵanda, maqsatymyzǵa jetken sı­ıaqtymyz,– deıdi Elena Gomer.

Bir aıta keterligi, fılmniń az ýaqyt ishinde sapaly túsirilýine Sandyqtaý aýdany men Balqash aýy­l­ynyń ákimdikteri de qol­daý kór­setipti. Osylaısha, Sand­yq­taý­dyń ákimi Asylbek Ismaǵambetov ózi basqaratyn aýdannyń kórikti jer­lerin kıno arqyly halyqqa nası­hattap, óńirde týrızmdi damytýdy kózdegen.

Túsirýshi komandanyń jumy­sy­na da qol soqqan jón. Aqpan aıynda jumysqa kirisken olar bas-aıaǵy bir­neshe aıda kartınany tolyq aıaq­tap úlgeripti. Sóıtip, kıno maý­symy qyzatyn, úlken premeralar úl­k­en ekranǵa jol tartatyn tusta kórermen nazaryna usynylyp otyr. Premerasy sátti ótken týyndynyń kórermenderi kóp bolady degen senim mol.

Arnur ASQAR,
«Egemen Qazaqstan»