Biregeı jobanyń qoıýshy dırıjeri - álemde suranysqa ıe maestrolardyń biri, «Astana Opera» teatrynyń bas dırıjeri Alan Bóribaev bolyp tabylady.
«№8 Sımfonııa - eshbir adam meken etpeıtin elsiz aralǵa ózimen birge jeteleıtin shyǵarmalardyń biri, sol jerde osy bir tańǵajaıyp mýzykany únemi tyńdaýmen bolýshy edim. Qyzyqty bir jaıt: 1910 jyldyń qyrkúıegindegi tusaýkeser kezinde Eýropada «EKSPO» kórmesi ótip jatqan bolatyn. Dál sol kezde oryndaýshylardyń sany boıynsha «Myń qatysýshy sımfonııasy» degen ataý alǵash ret paıdalanylǵan edi. Osyndaı asa iri jobany iske asyrý - kez kelgen ujym úshin kúrdeli syn. Bir úlken hor men orkestrge biriktirý úshin aldymen bir ujymnan ekinshisine kóship júrip, óte kóp daıyndalamyn. Birlik, baýyrlastyq, jalpyǵa ortaq mahabbat ıdeıasy ár kezde de ózekti ári osy nıettiń qozǵaýshy kúshi boldy, onyń ústine bul sımfonııanyń basty oıy - bizdiń barlyq ǵalam mahabbattan jaralǵan degen pikirge saıady. Premera shynymen de álemde teńdesi joq biregeı oqıǵa bolmaq», - dep atap ótti Alan Bóribaev.
Konsertke «Astana Opera» teatrynyń jetekshi solısteri Saltanat Ahmetova, Jupar Ǵabdýllına, Aıgúl Nııazova, Nurlan Bekmuhambetov, Tatıana Vısınskaıa, sonymen qatar Abaı atyndaǵy MAOBT jetekshi solısteri Oksana Davydenko, Oleg Tatamırov, Taır Tajıgýlov qatysady.
Uıymdastyrýshylardyń habarlaýynsha, Gýstav Malerdiń ǵalamat týyndysyn «Astana Operanyń» sımfonııalyq orkestri, hory jáne balalar hory, sondaı-aq ataqty ıtalıandyq Karlo Felıche (Genýıa qalasy) teatrynyń, Abaı atyndaǵy Memlekettik akademııalyq opera jáne balet teatrynyń orkestri men hory, Qazaqstan Respýblıkasy Memleketik akademııalyq sımfonııalyq orkestri men «Solıster akademııasy» Memlekettik kameralyq orkestri oryndaıtyn bolady.
Olarǵa qazaqstandyq jetekshi hor ujymdary qosylady: Atap aıtqanda, B.Baıqadamov atyndaǵy Memlekettik hor kapellasy, Ońtústik Qazaqstan oblystyq opera jáne balet teatrynyń hory, Ǵ.Jubanova atyndaǵy Aqtóbe oblystyq fılarmonııasynyń qazaq kameralyq hory, Qazaq ulttyq óner ýnıversıtetiniń aralas hory, uldar hory, «Eligaı» balalar hory, A.Jubanov atyndaǵy respýblıkalyq daryndy balalarǵa arnalǵan mamandandyrylǵan mýzykalyq qazaq orta mektep-ınternatynyń, K.Baıseıitova atyndaǵy respýblıkalyq daryndy balalarǵa arnalǵan mamandandyrylǵan mýzykalyq orta mektep-ınternatynyń, M.Tólebaev atyndaǵy mýzykalyq №5 mekteptiń, P.Chaıkovskıı atyndaǵy mýzykalyq kolledjdiń balalar hory jáne Astana, Almaty, Pavlodar, Petropavl, Aqtóbe, Kókshetaý, Semeı, Oral qalalarynan kelgen basqa da quramdar bar.
