Bes gektar aýmaqty alyp jatqan «Nurly jol» saıabaǵynyń janynda Drama teatr, ońaltý ortalyǵy, Nazarbaev mektebi, Jekpe-jek saraıy, ortalyq basseın, O.Rypakova atyndaǵy jeńil atletıkalyq manej syndy sporttyq-mádenı nysandar oryn tepken. Jasyl jelekke oranǵan saıabaqtyń qaq ortasynda «Nurly Jol» monýmenti ornalasqan. Joba avtory Sársen Seıitovtiń aıtýynsha, týyndy elimizdegi bereke-birlik pen yrys-yntymaqty pash etedi. Memleketimizdiń týy tústes stellanyń qos baǵanasy bir jaǵynan Eýropa men Azııanyń túıisýin beınelese, ekinshi jaǵynan, О́skemendegi Ertis pen Úlbi ózenderin bederleıdi. Uzyndyǵy 22 metr monýmenttiń tóbesinen qalyqtaǵan qyran beınesin kórýge bolady.
«Mundaı demalys ornyn tamashalaýdyń ózi bir ǵanıbet. Bul saıabaq О́skemen qalasynyń turǵyndary men qonaqtarynyń kóńilinen shyǵady dep oılaımyn. О́ndiristi shaharda taǵy da bir jasyl jelekpen kómkerilgen orynnyń paıda bolǵany qýantady», - dedi Prezıdent.
Elbasy saıabaq ishin aralap, Zeınolla Samashev, Ábdesh Tóleýbaev, Karl Baıpaqov syndy arheologtarmen, óńirdegi iri kásiporyndar men kásipkerlermen kezdeskennen keıin aımaqtyń qoǵamdyq uıymdarynyń ókilderimen tildesti.
Eń aldymen sóz alǵan Qazaqstan-Amerıka erkin ýnıversıtetiniń prorektory Marına Kıkına jaqynda Astanaǵa arnaıy baryp, EKSPO kórmesin tamashalap, erekshe áser alyp qaıtqanyn aıtty.
«Men Semeı óńirinen keldim. Sizdiń jasampaz eńbegińizdiń arqasynda elimizdiń asyǵy alshysynan túsip tur. Kúrmeýi qıyn máselelerdiń barlyǵy Saryarqa tórinde sheshimin taýyp jatyr. Qazirgi ýaqytta tórtkúl dúnıeniń nazary Astanada ótip jatqan EKSPO kórmesinde. Kórmeni ózim de tamashalap qaıttym. Qalashyqtyń qaq ortasynda Qazaqstan pavılıonynyń qasqıyp turǵanyn kórip qatty qýandym. Bul – ǵajap dúnıe. Ekinshi aıtarym, qazirgi tańda qasıetti Semeı qalasy kúnnen kúnge kórkeıip keledi. «Nurly jol» baǵdarlamasy men Sizdiń jaqynda ǵana jarııalanǵan «Rýhanı jańǵyrý: bolashaqqa baǵdar» maqalasynyń aıasynda aýqymdy jumystar júrgizilip jatyr. Qazir Semeıde 20 kóp qabatty úı, 5 myń oryndyq «Abaı arena» stadıony salynyp jatyr. Qala halqy buǵan rıza», - dedi budan keıin sóz tizginin alǵan Semeı qalasynyń ardagerler keńesiniń tóraǵasy Amantaı Doǵalaqov.
Memleket basshysy Semeı óńirin árkez nazarynan tys qaldyrmaıtynyn, qalada jasalyp jatqan jumystardyń barlyǵyn baqylap otyratynyn aıtyp, qazirgi tańdaǵy Shyǵys Qazaqstannyń damý qarqynyna joǵary baǵa berdi.
«Shyǵys óńirin erekshe jaqsy kóremin. Bul – uly Abaıdyń, Shákárimniń, Muhtardyń eli. О́ndiristi óńir, ındýstrıaldy ólke. Aýyl sharýashylyǵy órken jaıǵan aımaq. Oblystyń damý qarqyny qýantady. Aımaqtyń bıýdjeti de aýqymdy. Oblys bıýdjetiniń 60 paıyzy áleýmettik salaǵa baǵyttalyp otyr. Ásirese densaýlyq pen bilim salasyna bólinetin qarjy jyldan jylǵa ulǵaıyp keledi. О́ńir 99 paıyz balabaqshamen qamtylǵan. Bul – elimiz boıynsha eń joǵary kórsetkish. Bıznestiń áleýmettik jaýapkershiligi aıasynda da az jumystar atqarylyp jatqan joq», - degen Prezıdent EKSPO halyqaralyq kórmesiniń mańyzdylyǵyna toqtalyp, barsha qazaqstandyqtardy aýqymdy sharany tamashalaýǵa shaqyrdy
Azamat QASYM,
«Egemen Qazaqstan»
О́SKEMEN
Sýretterdi túsirgen: Mánap MURZATAEV
