Elorda turǵyndary men qonaqtaryna arnap Syr óńirinen 30-dan astam ónim túrleri jetkizildi. Onyń ishinde kúrish, ara baly, jemis-jıdekter, kókónister bar.
– О́tken jyldan bastap baqsha ónimderin kórshiles Reseı, Qyrǵyzstan elderine eksportqa shyǵaryp otyrmyz. Mine, osyndaı sapaly taýarlarymyzdy EKSPO kórmesin paıdalanyp, elordalyqtarǵa da usynýdy jón kórdik. Al quny jaǵyna keler bolsaq, Astana ákimdigimen kelise otyryp, halyqqa qolaıly baǵany usynyp otyrmyz. Bul jármeńke Elordadaǵy kez kelgen dúkennen arzan. Taǵy bir aıtarymyz, bul ónimder jeke kásipkerlerdiń taýarlary, memleket transport jaǵyn qamtamasyz etip otyr, – dedi Qyzylorda oblystyq aýyl sharýashylyq basqarmasynyń basshysy Baqyt Jaqanov.
Qyzylorda oblysy jahandyq kórme kezinde barlyǵy tórt jármeńke josparlaǵan. Bul joly quny 75 mln teńge bolatyn on eki kólikpen 200 tonnaǵa jýyq ónim ákelindi. Syr óńirinen 26 taýar óndirýshisi qatysty. Osydan keıin 5-6 tamyzda jáne 15-16 qyrkúıekte ótedi. Ol kezde ónim túrleri de mol, baǵa munan da tómen bolmaq.
Qyzylorda men kúrish egiz uǵym, tutynýshylar da sony kútedi, sondyqtan uıymdastyrýshylar ónimderdiń ishinde kúrishke basa mán berip otyr.
Bul jármeńkeni Qyzylorda, Atyraý, Aqmola oblystary birge ótkizip otyr. Aqmola oblysy sút, et, jumyrtqa ónimderin jetkizse, Atyraý tıisinshe teńiz mańaıynda ornalasqandyqtan balyq ónimderine basa mán berdi.
Jaz aıynyń alǵashqy ónimderi qalaǵa aýyl sharýshylyǵynyń berekesin ala kelgendeı. Jármeńkedegi adamdardyń qatary da qalyń, bári de kóńildi. Oılaǵannan tómen baǵaǵa qalaǵandaryn alyp, qalǵandaryna kóz toıǵyzyp, kóńil sýaryp aralap júr.
Aıan ÁBDÝÁLI,
«Egemen Qazaqstan»
