Bıylǵy fınalǵa osy jobanyń eki dúrkin chempıondary – qazaqstandyq «Astana arlandary» (2013, 2015) men kýbalyq «Kýba qabylandary» (2014, 2016) shyqqan bolatyn. Fınaldyq aıqasta eki komanda jankúıerlerge naǵyz boks keshin syılady. Kýbalyq tájirıbeli bylǵary qolǵap sheberlerine laıyqty qarsylyq kórsetip, tabandylyq tanytqan «arlandarymyz» jobanyń úsh dúrkin chempıony atandy.
Keshtiń shymyldyǵyn 49 kılo salmaqtaǵy Temirtas Júsipov pen Iohanýs Argılagos ashyp berdi. Kezdesý bastala sala qazaqstandyq boksshy qarsylasyn bet qaratqan joq. Júsipov qarsylasynan jas jaǵynan da, tájirıbe jaǵynan da basym ekenin anyq baıqatty. Al ekinshi jekpe-jekke shyqqan Ilııas Súleımenov qazaq jankúıerlerine esimi asa tanymal emes kýbalyq boksshy Haver Ibanesten basym tústi. Birinshi raýndty bir-birimen ańdysyp ótkizgen boksshylar, ekinshi raýndtan bastap shıraq qımyldaı bastady. Úshinshi raýndta kýbalyq boksshy basymdylyqqa ıe bolǵandaı kóringen. Alaıda, Ilııas qarsylasyna mursha bergen joq. Esep 3:0.
Úshinshi kezdesý «arlandar» úshin sátsiz bastaldy. 91 kılodaǵy Anton Pınchýk kýbalyq Erıslandı Savonǵa ese jiberse, Antonnyń izin ala 64 kılo salmaqtaǵy osy jobanyń debıýtanty Dilmurat Mıjıtovti óte tájirıbeli qarsylasy Endı Krýz sál ǵana basymdyqpen (1:2) utyp ketti. Al alǵashqy bestiktiń sońǵy kezdesýinde 75 kılodaǵy taǵy bir talantty boksshymyz Amanqul Ábilhan Rıo Olımpıadasynyń chempıony Arlen Lopespen teń dárejede judyryqtasqan edi. Biraq tóreshiler jeńisti biraýyzdan (0:3) kýbalyq boksshyǵa berdi. Sóıtip, alǵashqy bes kezdesýdiń qorytyndysy boıynsha esep – 2:3, «qabylandar» alǵa shyqty.
Ekinshi bestik kezdesýi de «arlandar» úshin jeńilispen bastaldy. Arman Rysbek (81 kg) Rıo Olımpıadasynyń chempıony Hýlıo Sezar la Krýzben judyryqtasyp, 0:3 esebimen jeńiliske ushyrady. Armannyń jeńilisi sátsizdik emes. Kezdesýge deıin-aq boks mamandary da, jankúıerler de La Krýzdy favorıt retinde sanaǵan edi. Armannan keıin sharshy alańǵa komanda kapıtany Oljas Sáttibaev pen Iosbanı Veıtıa shyqty. Jekpe-jektiń birinshi raýndy kýbalyq boksshynyń basymdyǵymen ótti. Kezdesýdiń qalǵan bóliginde Oljas qarsylasy Veıtıany bilgeninen jańyldyrýǵa tyrysqan. Áıtse de, kýbalyq boksshy Sáttibaevtyń oılaǵanyn júzege asyrýǵa múmkindik qaldyrǵan joq. Jalpy esep – 2:5.
Fınaldyq kezdesýdiń eń tartysty jekpe-jegi +91 kılodan joǵary salmaqta ótti. Osy kezdesýde Oljas Boqaev jeńiske jetse, «arlandarǵa» úmit oty qaıta janar edi. Al Ioandı Toırak jeńiske jetse, kýbalyqtar merziminen buryn jobanyń chempıony atanady. Jekpe-jek bastala sala «Qazaqstan» sport keshenine jınalǵan jankúıerler qıqýǵa salyp, Oljastyń namysyn janı tústi. Boqaevtiń ózi de osy kezdesýde jeńiske jetpese, áriptesteriniń jeńisi aýa qushatynyn sezip, ár raýnd saıyn shıraq qımyldap, ózinen 15 kılo aýyr qarsylasyn jeńýge baryn saldy. Sóıtip, Oljas Boqaev tájirıbeli kýbalyq boksshy Ioandı Toırakty tas-talqan etip utyp, komandasynyń jeńiske degen úmit otyn qaıta jaqty. Oljastan keıin sharshy alańǵa shyqqan Zákir Safıýllın (60 kg) men Aslanbek Shymbergenov (69 kg) Olımpıada chempıony (Lazaro Alvares) men júldegerine (Iglesıas Sotolongo) esh múmkindik bergen joq. Fınaldyń negizgi on jekpe-jeginen keıin nátıje teńesip, 5:5 esebimen aıaqtaldy.
Negizgi esep teń aıaqtalyp, tarazy basy teń túsken soń jeńimpaz klýbty anyqtaý úshin 52 kılo salmaqta qosymsha kezdesý ótti. «Arlandar» sapynan synǵa túsken 2014 jylǵy áskerıler arasyndaǵy álem chempıony Oljas Baınııazov kýbalyq qarsylasy Frank Zaldıvardy qapy qaldyryp, komandasyna óte qıyn ótken kezdesýde jeńis syılady. Osylaısha, «Astana arlandary» Dúnıejúzilik boks serııasynyń (WSB) jetinshi maýsymdaǵy jeńimpazy bolyp ǵana qoımaı, jobanyń úsh dúrkin chempıony atandy.
Bıylǵy fınalda chempıon ataný úshin «Kýba qabylandary» óz eliniń birinshi nómirli boksshy sanalǵan Iglesıas Sotolongo (69 kg), Arlen Lopes (75 kg) pen Hýlıo Sesar la Krýs (81 kg) sekildi Olımpıada chempıondaryn alyp kelgenin aıta ketken jón. Olarǵa qarsy shyqqan elimizdiń ekinshi nómirli boksshylary kýbalyqtardyń ataq-dańqtarynan esh qaımyqqan joq. Buryn qazaq boksshylary kýbalyq bylǵary qolǵap sheberlerimen seskenip, jasqanyp judyryqtasatyn. Al qazir bári kerisinshe. Kýbalyqtar qazaq boksshylarymen sanasyp, ımene judyryqtasatyn boldy. Bul degenimiz Kýba boksynyń álsirep ketkeni emes, qazaq boksshylarynyń Bostandyq aralynyń boksshylarynan deńgeıi jaǵynan asyp túskenin ańǵartady.
Álı BITО́RE,
«Egemen Qazaqstan»
