Bıyl elordada aýqymdy «Astana Innovations Challenge» startap-marafony iske qosylǵan bolatyn. Is-sharany Astana qalasy ákimdigi atynan «Astana Innovations» AQ MOST bıznes-ınkýbatorymen birlese otyryp, «Shevron» kompanııasynyń qoldaýymen uıymdastyrdy. Bul jas ınnovatorlar men ónertapqyshtarǵa arnalǵan joba. Iаǵnı, mundaı sharalar arqyly jas daryndardyń úzdik ıdeıalaryn júzege asyrýǵa múmkindik asha otyryp, jastardy qala ómirin jaqsartýǵa úles qosýǵa shaqyrady. Joba aıasynda jyldyń sońyna deıin taqyryptyq baǵyty ártúrli 4 startap ýıkend jáne 2 hakaton uıymdastyrý kózdelgen. Jeksenbi kúni sonyń alǵashqy ýıkendti qorytyndylandy.
Sharanyń taqyryby kommýnaldyq sharýashylyqtyń, kólik pen qala ekologııasynyń túıtkildi máseleleri salasyndaǵy ınnovasııalyq sheshimder oılap tabýmen baılanysty boldy. Qorytyndysynda eń perspektıvaly degen 3 startap-joba anyqtalyp, olar ózara 500 000 teńge júlde qoryn bólisti. Sonymen qatar, jeńimpaz-komandalar MOST bıznes-ınkýbatory negizinde qarqyndy akselerasııa baǵdarlamasynan ótý, jobany bıznes-jebeýshiler qaýymdastyǵy músheleri aldynda tanystyrý, qarjylandyrýdy alǵanǵa deıin jobanyń súıemeldenýi jáne jobalardy elordada engizý múmkindigin aldy.
Birinshi oryndy memlekettik bıýdjettiń elektr energııasyn tóleýge ketetin shyǵystaryn azaıtý týraly máseleni sheshýge baǵyttalǵan «Derbes kóshe jaryǵy» jobasymen «Sun project» komandasy ıelense, ekinshi oryndy «Jaıaý júrginshiler jolynan muzdy jyldam ári uqypty alyp tastaýǵa arnalǵan jınaqy mehanıkalandyrylǵan qurylǵy» jobasyn tanystyrǵan «Ice Killers» komandasy jeńip aldy. Úshinshi oryn «Qaldyqtardy jınaýdy avtomattandyrý júıesi» jobasymen «Tazalyk» komandasyna buıyrdy. Sonymen qatar, Astana qalasynyń ákimi Á.Isekeshevtiń bastamasymen aqyldy úı, PIK, agroónerkásiptik keshen júıelerin avtomattandyrý boıynsha jobalardy iske asyratyn «Biregeı basqarý modýli» jobasyn tanystyrǵan «Double bro’s» komandasyna arnaıy júlde berý týraly sheshim qabyldandy.
Qorytyndy sózinde Astana qalasynyń ákimi «Qazaqstannyń Úshinshi jańǵyrýy: jahandyq básekege qabilettilik» atty Memleket basshysy Joldaýynyń iske asyrylýyna yqpal etetin mundaı is-sharalardy ótkizýdiń mańyzdylyǵyn, sondaı-aq, Qazaqstannyń ınnovasııalyq damýyndaǵy jas urpaqtyń belsendiligi joǵarylyǵyn erekshe atap ótti.
Dınara BITIK,
«Egemen Qazaqstan»
