Ásirese, onyń aıasynda ótip jatqan ádebı, mádenı sharalardyń ishinde biz úshin teatr ujymdary qoıylymdarynyń orny bólek. Máselen, sońǵy bir-eki aı bederinde elimizdiń teatr ómirinde qanshama aıtýly oqıǵalar boldy. Halyqaralyq mártebesi bar eki birdeı festıval – «Sahnadan sálem!» men A.Áshimovtiń 80 jyldyǵyna arnalyp, tuńǵysh ret ótkizilgen Dúnıejúzilik «Astana» teatr festıvali osy aıtyp otyrǵan oıymyzdyń jarqyn dáleli ispetti. Qazaq eliniń tóbeli tórine alys-jaqyn shetelderden nebir maıtalman sarapshylar men sahna sańlaqtaryn ozdyryp, Qazaqstan damyǵan mádenıeti men óneri arqyly da eńsesi tiktelip, endigi kólbegen eńseli el ekenin tanytýda. Elimizdegi eń úlken óner oshaqtarynyń biri sanalatyn Qazaq memlekettik akademııalyq Ǵ.Músirepov atyndaǵy balalar men jasóspirimder teatry EKSPO-2017 halyqaralyq mamandandyrylǵan kórmesi men Astana kúni qurmetine elordada óner kórsetti. «Etnoaýyl» ulttyq mádenı kesheninde Baıǵalı Esenálıevtiń «Bazaryń tarqamasyn» mýzykalyq dramasymen bastalǵan óner sapary «Astana Balet» teatrynda tartymdy repertýarmen jalǵasyn tapty.
Sonyń biri, «Qara shekpen» áfsanasy Túrkııa memleketiniń Konıa qalasynda ótken «Myń tynys – bir daýys» atty halyqaralyq jáne respýblıkalyq teatrlar festıvaline qatysqan, teatr repertýaryndaǵy shoqtyǵy bıik qoıylymdardyń biri bolyp sanalady. Áfsananyń avtory – G.Hýgaev. Q.Tóleýishov aýdarmasymen sahnalanǵan týyndynyń rejısseri – Ashat Maemırov. «Jer betin mekendeıtin on segiz myń ǵalamnyń ishindegi eń qudirettisi de, eń aqyldysy da, eń ádemisi de – Adam...» – dep ún qatady Tuzar (ıt), áfsananyń basty keıipkeri. Al biz dál osyndaı «dárejege» rasymen, laıyqpyz ba?! Avtor jer betindegi búkil adamzat balasynyń qaıǵy-qasiretiniń basty sebebin izdep, kópshilikke astarly oı tastaıdy.
«Qara shekpen» spektakli – adamdar arasynda joǵalyp bara jatqan adaldyq pen shynaıylyqty, adamgershilik pen dostyq qarym-qatynas qasıetterin qadirleýge úndeıtin qundy dúnıe.
Músirepovtikterdiń Astana kúni merekesine tartýlary ishinde Ý.Shekspırdiń «Bir sen úshin týdym...» tragedııasy erekshe oryn alady. Abyz jazýshy Ábish Kekilbaıuly aýdarmasymen rejısser Juldyzbek Jumanbaı sahnalaǵan týyndy mahabbat maıdanyn jyrlaıdy.
Máńgi mahabbat bar jerde, máńgi mashaqat bar. Áýlet pen áýlet, top pen top, tobyr men tobyrdyń kesirinen qanshama qan tógildi, qanshama mahabbat ıesi qurban boldy. Yqylym zamannan kele jatqan adamzattyq ahýal osy.
Shekspırdiń «Romeo men Djýlettasy» da – solardyń kebi... Shekspırdiń 400 jyldyǵyna arnalǵan bul qoıylymnyń basty ereksheligi jáne tól ónerge etene jaqyndyǵy – Shákárim Qudaıberdiulynyń óleńderimen kórkemdelýi. Qazaqtyń ulttyq mahabbat dastandarynyń sarynyna jaqyndatyp, «Dýdar-aı» áni leıtmotıvi bolǵan «Romeo men Djýletta» tragedııasy «Bir sen úshin týdym...» degen atpen kórermenge jol tartqan eken. Qoıylym rýhanı qundylyqtarǵa kózqaras pen túsinik kómeski tarta bastaǵan ásirese qazirgi zaman úshin óte-móte mańyzdy bolyp qala bermek.
Qarashash TOQSANBAI,
«Egemen Qazaqstan»
