Pyshaqpen kese bergenim sol edi, qaqtalǵan shujyqtyń arasynan temirdiń bólshegi jarǵaq qulaq sekildi salbyrap shyǵa kelmesi bar ma? «Búgin meni perishtem qaqty. Erteń osyndaı jaıtqa ózgeler kezikse she?» dep ishteı qapalanyp, jýrnalıstik táýekelge bel býdym. Nasyrǵa shapqan keleńsiz isti aıaǵyna deıin jetkizýdi jón kórdim. Aldymen oblystyq densaýlyq saqtaý basqarmasyna habarlastym. Ondaǵylar árnárseni syltaýratyp, aqyry basshylardyń ruqsatynsyz aqparat bere almaıtyndaryn kóldeneń tartty. Bir kezde basqarma jetekshisiniń orynbasary Tatıana Gorlovaǵa qolymyz jetti-aý! Ol shaǵym ıesin qoldaýdyń ornyna «Budan túk ónbeıdi. О́ıtkeni, sheteldik óndirýshi kompanııalarǵa shara qoldana almaımyz. Al satýshynyń kinási joq», dep úmitimizdi short úzdi.
«Jazǵan qulda sharshaý joqtyń» kerimen taýardy zerthanada tekserip alýdy uıǵardym. «Kez kelgen taýar óndirýshige azyq-túlik qaýipsizdigin qamtamasyz etýdiń shart-talaptaryn qoıa bilmesek, bolashaq urpaq densaýlyǵy ne bolmaq?» degen oımen hattamany qoltyǵymyzǵa qystyryp, emen esikti erkin attap kirdim. «Qyrsyq qyryq aǵaıyndy» degen ras eken. Zerthanadaǵylar taýardyń syrtyndaǵy tańbalaý qaǵazyn /markırovka/ talap etti. «Bolmaǵan, joq dúnıeni qaıdan tabamyn?» dep qansha bezek qaqsam da, mańaılaryna jýytatyn túri kórinbedi. Ádildiktiń túbine jetem be degen oıym kózden bul-bul ushyp, órekpigen kóńilim sý sepkendeı basylyp qaldy.
«Daýdy sheshen bitirmeıdi, sheber bitiredi» demekshi, qoǵamdyq uıymnyń qyzmetine júginýden basqa amal qalmady. Oblystyq kásipkerler men tutynýshylardyń quqyǵyn qorǵaý qaýymdastyǵynyń tóraıymy Nadejda Dýbovaıaǵa mán-jaıdy túsindirip edim, birden iske kiristi. «Mundaı jaýapsyzdyqqa áste jol berýge bolmaıdy. Jazasyn tarttyrý kerek. Qajet bolsa, sotqa deıin dabyl qaǵamyz» dep, kóńilimdi kóterip tastady. Uzyn sózdiń qysqasy, 30 jylǵa jýyq turǵyndardyń túıtkildi máselelerin sheship berýde ilkimdilik kórsetip júrgen Nadejda Vladımırovna óndirýshi kompanııadan 50 myń teńge moraldyq shyǵyndy zamatta óndirip bergizdi.
Al meniń basymnan ótken sergeldeńge, bolmasa osyǵan uqsas jaıttarǵa zańǵa shorqaq, qarapaıym adamdar tap bolsa, shujyq ornyna temir shaınap otyra bermek pe?
Gúlgúl QÝATQYZY,
jýrnalıst
Soltústik Qazaqstan oblysy
