«Jasyl el» baǵdarlamasy jazǵy maýsym kezinde stýdent-jastardy jumyspen qamtýǵa úles qosyp keledi. Pavlodar óńirinde bıyl 2 myńnan astam jas baǵdarlama aıasynda eńbek etpek. Jastar qazir zamanǵa saı jańashyldyqty jaqsy kóredi, ómirdiń ár salasyna «Jasyl eldiń» izin qaldyrǵysy keledi. Mysaly, byltyr jastardyń «Sý asty» jasaǵy Baıanaýyldaǵy Jasybaı kóliniń túbin tazalaý jumystaryna, arheologııalyq toppen birge Lebıaji aýdanyndaǵy Bórili kóliniń mańynda qazba jumystaryn júrgizýge qatysty. Sonymen birge «Kreatıvnyı Pavlodar» aerografııalyq jasaǵy, «Járdem taım» qalpyna keltirý jasaǵy, «Jasyl el baqshalyǵy» saıajaı jasaǵy jáne qurylys jasaǵy iske kiristi. Jaz boıy eńbek jasaqtary qatarynda 2500 «jasyleldik» stýdent eńbek etedi. Olardyń qatarynda oqýshylar da bar. Stýdentter, jumyssyz jastar, bári birge qurylysta jáne áleýmettik nysandarda eńbek etýde, abattandyrý men kógaldandyrýǵa, saıabaqtar men ózenderdi tazalaý jumystaryna qatysýda.
Al, «Jasyl el» qalalyq shtabynyń komandıri Orazaly Sársenovtiń aıtýynsha, «Jasyl el» oblystyq eńbek jasaqtary qaladaǵy turǵyn úı-kommýnaldyq sharýashylyǵy bólimimen birlesip senbilikter ótkizedi. Tipti 400-den astam qap qoqys jınap beripti. Sondyqtan, senbilikke qatysqan qyz-jigitter áleýmettik jelidegi paraqshalaryna jınaǵan jer emes, qoqys tastamaıtyn jer taza ekenin bilý týraly jazdy.
– Árqaısymyz qorshaǵan orta, týǵan jerimiz úshin jaýapkershiligimizdi sezinýimiz qajet, bul – bizdiń úıimiz, deıdi «jasyleldikter».
Stýdent jastardan quralǵan qurylys jasaqtary qazir oblys ortalyǵyndaǵy «Járdem» JShS-men birlesip, «Nurly jol» baǵdarlamasynyń jańadan salynyp jatqan nysandarynda eńbek etýde. Al, bıylǵy jazda «Jasyl el baǵbanshylyǵy» dep atalatyn jastar eńbek jasaǵynyń taǵy bir jańashyldyǵyn estidik. Jastar múgedek jandarǵa arnap kartop otyrǵyzdy. Belsendilerdiń aıtýynsha, stýdentter jaz boıy ekken ónimderin kútip, baptap, kúzde múgedek jandardyń úılerine aparady. Bul shara «Jasyl el» jobasy aıasynda jas urpaqty eńbekti baǵalaýǵa úıretedi. Eńbekaqylary – 65-70 myń teńge. Sondyqtan, jastar jasaǵynyń qatarynda eńbek etkisi keletinder kóbeıeri sózsiz. «Jasyl eldiń» ekinshi kezeńi shilde aıynda bastaldy. Jastar basqarmasynyń basshysy Natalıa Nefedovanyń aıtýynsha, «Jasyl el» eńbek jasaǵy jyl boıyna, demalyssyz eńbek etedi. Endigi másele – jazǵy maýsymda eńbek jasaqtarynda júrgen jastarǵa arnaıy kıim qajettigi aıtylýda. Sondyqtan, basqarma biryńǵaı eńbek formasyna tapsyrys bermekshi. О́ıtkeni, «Jasyl el» jasaǵynyń jastary, stýdentter qysta qar tazalaý jumystaryna, kóktem, jaz kúz mezgilderinde de naýqandyq jumystarǵa qatysýda. Jazǵy maýsymda ekologııalyq, qurylys, úgit-nasıhat tárizdi otrıadtarda eńbek etse, kúzde egin jınaý, qala ishindegi baqtarda japyraqtardy jınaý men qoqystardan tazartý jumystaryna jiberiledi. Jastar eńbek jasaqtarynyń arasyndaǵy respýblıkalyq deńgeıde bizdiń pavlodarlyq «Jasyl el» stýdent-jastar jasaǵy jyl saıyn úzdik kórsetkishterge ıe bop keledi.
Farıda BYQAI,
«Egemen Qazaqstan»
PAVLODAR
Sýretti túsirgen Aıgúl Esenálı
