2014 jyly Qazaqstanda «Galam TV» ınternet arqyly habar taratý qyzmeti jumys istegen. Alaıda, suranystyń az bolýynan, ıaǵnı Chrome, Opera, Yandex, Internet Explorer braýzerlerinde jumys istemegendikten, mobıldik qosymshasy tolyq daıyndalmaǵandyqtan, sondaı-aq, ózge de túrli sebepterge baılanysty jumysy toqtap qalǵan bolatyn.
«Bıyl Aqparat jáne kommýnıkasııalar mınıstrligi men «Qaztelradıo» AQ «Galam TV» jobasyn qaıtadan jandandyryp otyr. Qazir onyń mobıldik qosymshasyn Google Play jáne AppStore arqyly júktep alýǵa bolady. Sonymen qatar, kez kelgen braýzerden qoldaný múmkindigi bar», dep jazdy Dáýren Abaev.
Álemniń kez kelgen jerinde telearnanyń arhıvin, baǵdarlamalaryn qaıtalap tegin kórýge, baǵdarlama kestesin josparlaýǵa bolady.
Jobanyń kelesi jańǵyrtylý kezeńinde «suranys boıynsha vıdeo», reıtıngti júıe, jeke kabınet sekildi birneshe jańa qyzmet iske qosý josparlanyp otyr.
Qazirgi ýaqytta «Galam TV» tegin jumys isteıdi. Munda Qazaqstannyń 24 telearnasyn kórýge múmkindik bar, sondaı-aq jyl sońyna deıin qoljetimdi tarıfter boıynsha sheteldiń 100 telearnasy qosylady.
Jobany damytý maqsatynda mınıstrlik qazaqstandyq kitaptar, ǵylymı jarııalanymdar men jýrnaldar, mýzyka, fılmder, sondaı-aq ózge de kontenttiń sandyq bazasyn qurýdy josparlap otyr.
