Ekologııalyq keńse ortalyq jylý men qýat kózderinen bas tartty

Jobasyn óz arhıtek­tor­larymyz jasaǵan eko-keńsege almatylyq kásipker, «Ýchıot.kz» brendiniń ıesi Maksım Baryshev  280 mıllıon teńge jumsaǵan.
Jalǵa qymbat keńse alýdan bas tartqan bıznesmenniń aıtýynsha, 6 qabatty ekolo­gııalyq ǵımarattyń quryly­syna ketken shyǵyny 7 jylda aqtalýy tıis. Qalada mundaı ǵımaratty ustap turýǵa aıyna 350 myń teńge ketse, jańa keńse tek únemdeýdiń arqasynda aıyna 70 myń teńge ǵana jumsap otyr. Keńsedegi qyzmetker­ler de elektr únemdeıtin noýt­býk­ter men qozǵalǵan kezde ǵana qýat jumsaıtyn lıftini paıdalanady.
Jasyl keńsede arnaıy qondyrylǵan júıe jańbyr sýyn qaıta súzgiden ótkizip otyrady. Tazartylǵan jańbyr sýy gúlder men kóshetterdi sýarýǵa, kanalızasııaǵa jum­salady.  

Ǵımarattyń shatyryna kúnnen qýat alatyn kollek­torlar ornatylǵan. Ári ol sýdy jylytyp otyrady. Osy tásildiń arqasynda keńse qalalyq jylýǵa tolyqtaı táýelsiz bolyp otyr. 
Keńseniń qalypty tirshiligi úshin qajetti elektr qýatynyń basym bóligi kún sáýlesinen alynady. Terezeleri de kúmistiń juqa qabatymen óńdel­gen, móldir súzgishti quraı­tyn mýltıfýnksııalyq áınek­pen jabdyqtalǵan. Bul áınek­ter jyldyń kez kelgen mezgi­linde jaıly mıkroklımat qalyp­tastyryp, energııa tapshylyǵyn týdyrmaıdy eken. Qabyrǵalar da jylý únemdeıtin birneshe qabatty jeńildetilgen aspaly jabyndylarmen qaptalǵan. 

Oǵan qosa zilzala bolǵan jaǵdaıda ǵımarattyń bekem­diligin arttyrýǵa baǵyttalǵan konstrýksııalyq sheshimder qoldanylǵan. Keńseniń 20 pa­ıyzdan astamy jer deńgeıinen tómen tur ári ǵımarattyń irge­tasy 1 metrlik qalyń monolıt beton plıtasyna ornalasqan. Nysannyń jer astyndaǵy salmaǵy jer ústindegi sal­maǵyna teńestirilgen. Demek, bul jer silkinisine tótep beredi. 

Aınash ESALI,
«Egemen Qazaqstan»

ALMATY