Oblys ortalyǵyndaǵy qalalyq aýrýhanaǵa túsken bes adamnyń ekeýi dárigerlerdiń qabyldaýynan keıin úılerine qaıtarylǵan kórinedi. Tabıǵattyń tosyn minezinen eń qatty zardap shekken - 82 jastaǵy óskemendik tyl ardageri Sherııazdan Isanov. Qarııanyń ústine úıdiń tóbesinde jatqan proflıst qulap, sonyń saldarynan ókpesine zaqym kelipti. Dárigerler men aqsaqaldyń týystary qazir aýyr halde aýrýhanada jatqan ardagerge turǵyndar tarapynan qan tapsyrylyp, járdem kórsetilse deıdi.
Tosynnan oryn alǵan jaǵdaıǵa oraı oblystyq aqparattyq ortalyqta shuǵyl brıfıng ótkizgen Tótenshe jaǵdaı departamenti men «Kazgıdromet» mamandary qazirgi ýaqytta oqıǵanyń mán-jaıyn, shyǵyn kólemin anyqtaý úshin oblys ákimdigi janynan arnaıy komıssııa qurylǵanyn, qalpyna keltirý jumystary júrgizilip jatqanyn habarlady. Jolyndaǵysyn jaıpap ótken qatty daýyldan keıin «112» jáne «101» jelilerine О́skemen qalasynan 100-den astam adam qońyraý shalyp, opyrylyp qulaǵan aǵashtar, ushqan shatyrlar, ústine zat qulap, búlingen kólikterdiń bar ekenin aıtypty. Ulan, Glýbokoe, Jarma aýdandary men oblys ortalyǵynyń keıbir shaǵyn aýdandarynda yshqyna soqqan jeldiń kesirinen jaryq sónip qalǵan bolatyn. Qazirgi ýaqytta qutqarýshylar oqıǵa ornyna baryp, árbir túsken habardy tekserip jatqan kórinedi. «Kazgıdromet» mekemesiniń málimetine súıensek, О́skemen qalasynda jeldiń jyldamdyǵy sekýndyna 24, Kókpekti aýdanynda 25, Zyrıan aýdanynyń Selezenka aýylynda 34 metrge jetipti. Tótenshe oqıǵa oryn alǵannan keıin kóligi qırap, kóńil-kúıi túsken keıbir turǵyndar tarapynan: «Tótenshe jaǵdaı qyzmetkerleri daýyldyń bolatynyn eskertpedi. Dabyl belgisin bildiretin sms habarlama jibermedi. Olardy sotqa beremiz» degen sózder aıtylǵan edi. Oblystyq Tótenshe jaǵdaı departameniniń tótenshe oqıǵalardy joıý bóliminiń basshysy Azamat Qapyshev osy jáıtke baılanysty túsinikteme berdi. «Biz «Kazgıdromet» mekemesiniń derekterine súıene otyryp, jeksenbi kúni tústen keıin mobıldi qosymsha jáne vedomstvonyń resmı saıty arqyly 17 shildede sekýndyna 20 metr jyldamdyqpen jel turatyny jaıynda habarladyq. Alaıda dabyldy eskertetin habarlama jeldiń jyldamdyǵy sekýndyna 25 metrge jetetini boljanǵanda ǵana jiberiledi. Sms-tiń jiberilmeýiniń mánisi osynda», - deıdi ol.
Aıtpaqshy, oblys turǵyndaryna arqany keńge salýǵa áli erte sekildi. «Kazgıdromet» mamandary jańbyr aralas qatty daýyl jaqyn kúnderi taǵy da qaıtalanýy múmkin ekendigin eskertedi.
Azamat QASYM,
«Egemen Qazaqstan»
Shyǵys Qazaqstan oblysy
