Osynaý aýqymdy sharanyń kózdegen maqsaty jaıly kópshilikti habardar etken mınıstrdiń aıtýyna qaraǵanda, bul joba Elbasynyń «Bolashaqqa baǵdar: rýhanı jańǵyrý» atty maqalasy aıasynda qolǵa alynyp otyr. Sebebi, Qazaqstan qazirgi tańda álem boıynsha syrttaǵy qandastaryn atajurtyna tartýshy azǵana elderdiń biri. Ekinshiden, jýyqta ótken Dúnıejúzi qazaqtarynyń V quryltaıynda Memleket basshysy: «Syrttaǵy elim degen qazaqqa – Qazaqstannyń esigi árqashan ashyq» - dep atap ótkenindeı, mınıstrlik osy tapsyrmany oıdaǵydaı oryndaý úshin jáne syrttaǵy aǵaıynnyń ómirin atajurttaǵy turǵyndarǵa keńirek tanystyrý maqsatynda osy jobany qolǵa alyp otyr. Bunyń syrtynda alys-jaqyn shetelderdegi qazaqtardyń Otanyna oralýyna bul fılm jol silteýshi baǵyt bolady degen úmit te joq emes...
Jobany iske asyratyn qurylym – «Qazkontent» AQ-na qarasty «Qazaqstan tarıhy» ınternet ujymy. Joba jetekshisi Oljas Berkinbaevtyń tanystyrǵan josparyna qaraǵanda, fılmniń ár serııasy 40 mınýttan turady. Ulaspaly týyndyda – áýeli, sheteldegi qazaqtardyń tarıhy, ómiri, etno turmysy men mádenıetin tolyq qamtý kózdelip otyr. Fılm qazaq tilinde jasalyp, tolyq montajdalǵan soń orys, aǵylshyn tilderine aýdarylady. Jumys barysynda qazaqtar ómir súrip jatqan eldiń arhıvtik qujattarymen de tanysyp, ony fılm barysynda paıdalaný, ári shettegi tanymal qaıratker tulǵalar jaıly jeke-jeke sıýjetter daıyndaý isi qolǵa alynbaq. Jumys barysynda keıbir mańyzdy sıýjetterdi ınternet arqyly tikeleı halyqqa joldap otyrý jaıy da qarastyrylǵan. Bul týyndy alda kele jatqan Táýelsizdik merekesine deıin tolyq aıaqtalady dep kútilýde.
Túsirilim toby jumysyn – Reseıdegi qazaqtar shoǵyr qonystanǵan Astrahan, Omby, Orynbor, Qorǵan qalalarynan bastap, Túrikmenstannyń – Túrikmenbashy, Tashaýyz, Ashhabad, Chardjoý óńirlerin qamtyp, О́zbekstan eliniń – Bostandyq aýdany, Tashkent, Shyrshyq, Ǵazalkentinde aıaldap, ary qaraı Tájikstan jerindegi – Dýshanbe, Soǵdy, Taýly Badahshan, Hatlon ólkelerinde jalǵastyrady. Odan keıin ShUAR-ǵa qarasty Úrimshi, Qumyl, Qaramaı, Barkól, Sháýeshek, Qulja, Morı sııaqty aımaq-aýdandardy aralap, Mońǵolııaǵa ótedi. Kelesi kezekte Iran Respýblıkasynyń Gorgan, Bender-Túrikmen, Tegeran, Meshhed qalalary men Aýǵanstan jerindegi Kabýl, Qundyz provınsııalarynda túsirilim jumysyn júrgizedi.
Beken QAIRATULY,
«Egemen Qazaqstan»
Sýretti túsirgen
Orynbaı BALMURAT,
«Egemen Qazaqstan»
