Ásirese, Qazaqstan Respýblıkasynyń Qylmystyq-atqarý kodeksin túsindirý maqsatynda IIM Qylmystyq-atqarý júıesi komıteti sottalǵan adamdar úshin kuqyqtyq túsindirý jumysyn udaıy júrgizýde. Máselen, ótken jyldyń ózinde túzeý mekemelerinde atalǵan kodekstiń normalaryn túsindirý boıynsha 18 myńnan astam dáris ótkizilgen.
Onyń birnesheýi Qylmystyq atqarý júıesi komıtetine qarasty Astana qalasyndaǵy ES-166/1 mekemesinde uıymdastyrylǵan. Mekeme basshysy, ádilet maıory Murat Oralbaev munda basshylyq tizginin qolǵa alǵanyna az ýaqyt bolǵanymen, ol bul jerde jeti jyldan beri eńbek etip keledi eken. Ishki jaǵdaıdyń ahýalyn bes saýsaǵyndaı biletin bilikti maman á degende mekemedegi tergeý kabınetteriniń sanyn kóbeıtýge kirisipti.
«Kópten beri osy jerde qyzmet etkendikten mundaǵy tergeý kabınetteriniń azdyǵy áriptesterimdi de alańdatatyn. Sondyqtan da jańa osy olqylyqtyń ornyn toltyrýdy jón sanadyq. Nátıjesinde, jýyrda ǵana 9 tergeý kabınetin talapqa saı iske qosyldy. Jalpy aýmaǵy 110 sharshy metrdi quraıtyn jańa tergeý kabınetteriniń ashylýy qajettilikten týyndaǵan dúnıe ekeni sózsiz. Sebebi, qorǵaýshylar men tergeýshiler kabınettiń bosaýyn kezek kútip sabylǵandyqtan, naýryz aıynda mekeme basshylyǵy dóńgelek ústel uıymdastyryp, osyndaı sheshim qabyldaǵan edi. Endi mine, qorǵaýshylarǵa barynsha qolaıly jaǵdaı jasaldy», deıdi Murat Saǵynbaıuly.
Negizinen, atalǵan mekemede memleket tarapynan berilgen lımıt 505 bolsa, búginde tergeýdegilerdiń sany 700-den asyp otyr. Buryndary osy ýaqytta bekitilgen lımıtten asý bolmaǵan eken. Sondyqtan da jańa tergeý kabınetteriniń ashylýyn – túrli qolaısyzdyqtardyń aldyn alý sharasy retinde baǵalaýǵa bolatyndaı.
Al endi tergeýdegiler men sottalǵandarǵa kúndelikti qajettilikten basqa qandaı jaǵdaı jasalǵan degen másele tóńireginde aıtar bolsaq, qazirgi kezde mekemede tergeýdegiler men sottalǵandarǵa arnalǵan kitaphana jumys isteıdi. Jýyrda ǵana tolyq jóndeýden ótken bul kitaphananyń qory on myńǵa jýyqtaıdy. Sondaı-aq, ol ýaqyt ótken saıyn jańaryp otyrady. Osylaısha, tergeýdegilerdiń tapsyrysy boıynsha kitaphana qyzmetkerleri oqyrmandardyń suranystaryn turaqty túrde qamtamasyz etip keledi. Tipti, mekemedegi sharýashylyqpen qamtamasyz etý jasaǵyndaǵy sottalǵandar da osy kitaphanadan qajetti ádebıetterin alyp, bos ýaqyttaryn paıdaly iske jumsap jatady.
Qazirgi kezde sharýashylyqpen qamtamasyz etý jasaǵynda elýden asa sottalǵandar bar desek, olardyń árqaısysy ózderine júktelgen mindetterdi tııanaqty atqarady. Al demalys jáne ózin-ózi tárbıeleý seksııasy ár merekede konsertter uıymdastyryp, jazasyn óteýshiler arasynda sporttyq oıyndardan saıystar ótkizdi.
Bıylǵy jyldyń mamyr aıynda mekemede eki ret ashyq esik kúni ótken bolsa, onyń biri qalalyq prokýratýra tarapynan uıymdastyryldy. Sondaı-aq, mundaǵy jazasyn óteýshiler ázirlegen shaǵyn konserttik baǵdarlamamen áspettelgen shara aıasynda sottalǵandardyń týǵandary mekeme aýmaǵyna kirip, jaqyndarynyń jatar ornyn, tamaqtanar jeri men bos ýaqyttaryn ótkizýge arnalǵan demalys bólmelerin, tazalyq keshenderin aralap shyqty. Sóıtip, kelýshilerdiń basym bóligi jasaqtaǵy tazalyq pen jasalǵan jaǵdaıdy kórip kóńilderin bir demdep qaıtqan-dy.
Nurlybek DOSYBAI,
«Egemen Qazaqstan»
