10 shildeden bastap Aqtóbe, Aqmola, Qostanaı, Qaraǵandy, Pavlodar jáne Shyǵys Qazaqstan oblystarynan, sondaı-aq Astana men Almaty qalalarynan kelgen 12-16 jas shamasyndaǵy 60 jas sportshy men 7 jattyqtyrýshy sporttyq lagerde bas qosty. Balalarǵa arnalǵan jazǵy saýyqtyrý sharasynyń uıymdastyrýshysy «Qazaqstan Respýblıkasy Shańǵy jarysynyń ulttyq federasııasy» QB balalarǵa arnap san túrli baǵdarlama ázirledi. Sportshy balalar basseınde shomylyp, voleıboldan ózara saıysqa tústi. Nátıjesinde, Aqmola oblysynyń komandasy birinshi oryndy qanjyǵasyna baılady. Sonymen qatar, olar atpen serýendep, ústel tennısin oınap shańǵy rollerlerinde komandalyq jarysqa qatysýǵa múmkindik aldy. Elimizdiń ár aımaǵynan kelgen jasóspirimderdiń qýanyshynda shek joq. Sebebi, osy tektes lager elimizde buryn-sońdy bolmaǵan edi.
– Qazirgi ýaqyttya balalardyń kóbi bos ýaqyttaryn telefonǵa telmirýmen ótkizetini shyndyq. Al, lagerde olar bir-birimen jaqyn aralasyp, áńgimelesip shúıirkelesedi. Jalpy sport lagerinde qandaı da bir ispen aınalysyp, jarystarǵa qatysqan kezde bos júrýge ýaqyttary bolmaıdy. Sońǵy ýaqyttary el jastarynyń sportqa qyzyǵýshylyǵy eselep artyp keledi. Qazirgi kezde kimde-kim sportpen aınalyssa, ol – mádenıetti, saýatty, sypaıy ári parasatty adam degen baǵa beriledi. Alǵashqy kúnnen bastap osy qasıetterdiń barlyǵyn jas shańǵyshylardyń boıyna sińirýge tyrystyq, – deıdi Qazaqstan Shańǵy jarysy ulttyq federasııasynyń bas hatshysy Andreı Nevzorov.
Aıta ketsek, atalǵan lager Ile Alataýy jotasynyń betkeıinen 1500 metr bıiktiktegi biregeı jerde, Talǵar qalasynda oryn tepken. Bıyl alǵash ret qolǵa alynǵan ıgi bastamany uıymdastyrýshylar «ár jazǵy demalysta dástúrli túrde ótkizemiz» dep otyr.
Arman OKTIаBR,
«Egemen Qazaqstan»
ALMATY
