Elorda tynyshtyǵy men «EKSPO-2017» kórmesi kezindegi qoǵamdyq tártip pen qaýipsizdikti kúsheıtý maqsatynda Ulttyq ulannyń óńirdegi bólinisterinen qosymsha kúsh jumyldyrylǵan bolatyn. Atap aıtsaq, 5510 (Kókshetaý q.), 5512 (Pavlodar q.), 5516 (Temirtaý q.) jáne 5451 (Qaraǵandy q.) áskerı bólimderinen myńǵa jýyq áskerı qyzmetshi kúsheıtilgen qyzmetti atqarý úshin 25-mamyrda Astana qalasyna arnaıy kelgen edi. Atylmysh toptar Ulttyq ulannyń elorda irgesindegi jedel maqsattaǵy quramasyna shoǵyrlanyp, kórmeniń ashylý sátinen beri qoǵamdyq tártip kúzeti boıynsha úzdiksiz qyzmet atqaryp keledi.
5573 áskerı bóliminde taıaýda ǵana ant qabyldap, arnaıy daıyndyqtan ótken jas shaqyrylym jaýyngerleri aldaǵy aptadan bastap qala tynyshtyǵyn kúzetý qyzmetine kirisedi. Osyǵan oraı, «Shyǵys» óńirlik qolbasshylyǵyna qarasty 5512 áskerı bóliminiń jaýyngerleri Astanadaǵy qyzmetin aıaqtap, 27-shilde kúni Pavlodar qalasyna oralmaq. Eki aıǵa jýyq «EKSPO-2017» qalashyǵynda qaýipsizdikti qamtamasyz etken shyǵystyq ulandar búgin kórmemen tanysýǵa múmkindik aldy.
-Biz jarty jyl buryn Ulttyq ulannyń Pavlodar qalasyndaǵy áskerı bólimine Otan aldyndaǵy boryshymyzdy óteýge kelgenbiz. Elimizdegi úlken sharany kózben kóremiz degen jospar bolmaǵan. Alaıda, osyndaı jaýapty mindetti atqaryp, kórmeniń sátti ótýine az bolsa da úles qosqanymyzdy úlken maqtanysh sanaımyz. Kórmeniń qalashyǵy óte unady, álemdik deńgeıdegi bul sharany – kemel keleshek úshin, urpaqtyń baqytty ómir súrýi úshin jasalǵan zor múmkindik dep esepteımin. Osyndaǵy qyzmetti sapaly oryndaýǵa jaǵdaı jasaǵan jedel qurama basshylyǵyna da alǵys aıtamyz, deıdi qatardaǵy jaýynger Sherııazdanov Rýslan áserimen bólisip.
Jaýyngerler Ulttyq pavılonnan bastap, kóptegen elderdiń jarqyn bolashaq jolyndaǵy josparlarymen, naqty qadamdarymen tanysty. Jańarmaly energııanyń balamaly kózderin paıdalanýdyń jáne «jasyl tehnologııalardy», energetıkalyq resýrstardy tıimdi tutynýdyń qyr-syryna qanyqty. Elimizdiń ekonomıkalyq jáne ınfraqurylymdyq turǵydan damýyna úles qosatyn iri nysandardy, aqparattyq-prezentasııalyq alańdardy tamashalady.
