«Qurmetti dostar, «Daryn» memlekettik jastar syılyǵyn alý úshin baıqaý jarııalanǵanyn habarlaımyn. Úmitkerlerdiń qujattary 2017 jyldyń 19 qyrkúıegine deıin Qazaqstan Respýblıkasy Din isteri jáne azamattyq qoǵam mınıstrligi Jastar saıasaty departamentinde qabyldanady. Elimizdegi 29 jasqa deıingi barsha jas daryndardy konkýrsqa qatysýǵa jáne ózderiniń shyǵarmashylyq jetistikterin kórsetýge shaqyramyn», - dep jazdy mınıstr.
Atap ótken jón, eki jylda bir ret taǵaıyndalyp kelgen «Daryn» jastar syılyǵy budan bylaı jyl saıyn beriletin bolady. Syılyq alý mártebesine ıe bolý úshin 29 jasqa deıingi azamattar ǵylym, ádebıet, jýrnalıstıka, sport, halyq shyǵarmashylyǵy, dızaın jáne beıneleý óneri, estrada, teatr jáne kıno, klassıkalyq mýzyka, qoǵamdyq qyzmet nomınasııalary boıynsha synǵa túse alady.
Jeńimpazdardy saltanatty marapattaý rásimi Qazaqstan Respýblıkasynyń Táýelsizdigi kúnine oraı ótkiziledi. Olarǵa «Daryn» memlekettik jastar syılyǵynyń laýreaty» ataǵy beriledi, dıplom, tósbelgi jáne aqshalaı syılyq tabys etiledi. Ár jyldary «Daryn» memlekettik jastar syılyǵy Serik Sápıev, Ilıa Ilın, Olga Shıshıgına, Aryn Orsarıev, Meıram Begentaev, Ǵalym Ahmedıarov, Sara Toqtamysova, Mahat Sadyq, Rınat Kertaev, Dıhan Qamzabekuly, Dosymjan Tańatarov, Aıgúl Imanbaeva sııaqty belgili talantty tulǵalarǵa jáne «Mýz ART», «Jigitter», «Ulytaý» toptaryna berildi.
