Saparǵa shyǵatyn avtobýstardyń óz jolaýshylaryn otyrǵyzýlary úshin arnaıy jabdyqtalǵan 29 platforma bolsa, sol zamandarda sol oryndardyń birde-biri bos bolmaı, bir avtobýs jolǵa shyǵyp jatqanda, onyń ornyn kezekte turǵan kelesi avtobýs basyp jatatyn. Olaı bolatyn jóni de bar edi. О́ıtkeni, ol ýaqyttarda bul avtovokzaldan Qostanaı oblysynyń barlyq aýdan ortalyqtaryn, úlkendi-kishili qalalary men aýyldaryn bylaı qoıǵanda, Ortalyq Qazaqstannyń barlyq qalalaryna jáne Reseıdiń shekaralas óńirleriniń irili-usaqty qalalaryna avtobýstar attanyp jatatyn. Sondyqtan bolar atalǵan avtovokzaldyń tóńiregi qashan barsań aýyr-aýyr sómkelerin kóterip, ersili-qarsyly jóńkilgen halyqtan arylmaıtyn. О́ziń baratyn baǵytqa bılet alý úshin uzyn-sonar kezekke de turýǵa týra keletin. Bulardyń bárin biz ánsheıin, ótkendi eske túsirý úshin aıtyp otyrǵan joqpyz. Taıaýda belgili bir sebeppen osy atalǵan vokzalǵa barýdyń sáti tústi. Shamamen alǵanda otyz jyldan keıin kórýim bolsa kerek. Baıaǵy ózimiz biletin avtovokzaldyń kórinisi men búgingi avtovokzaldyń kórinisiniń aıyrmashylyǵy jer men kókteı. Vokzaldyń ishi-syrtynda jıyrma-otyzdaı ǵana adam júr. Olardyń da keıbireýleri shyǵaryp salýshylar men kútip alýshylar eken. Soǵan sáıkes joǵaryda ózimiz aıtqan arnaıy jabdyqtalǵan 29 orynnyń eki-úsheýinen basqasy qańyrap bos tur. О́ıtkeni, burynǵydaı jan-jaqqa aǵylyp jatqan avtobýs ta, ıin tiresken jolaýshy da joq. Ol az deseńiz, ǵımarat qazirgi ýaqytta jekemenshikke satylǵan, bul jaǵdaıdyń da joǵaryda aıtylǵandaı kóńilsiz kórinisterdiń oryn alýyna sebepker bolýy múmkin-aý degen oı keldi kókeıimizge. Olaı deıtinimiz, avtovokzal tóńiregi shyr aınaldyra qorshalyp tastalǵan, kireberiste kúzetshi tur. Jolaýshylar saparǵa shyǵatyn orynǵa emes, beıne-bir abaqtynyń aýlasyna kirip kele jatqandaı áserde qalady ekensiń. Osyndaı sebepten avtomashına turmaq, jaıaý júrginshilerdiń ózderi bir izben kirip, bir izben ǵana shyǵady. Demek, bir jaqyn adamyńdy alys saparǵa shyǵaryp salyp nemese qarsy alǵyń kelse, onyń sómkesin jarty shaqyrym jerden jaıaýlap-jalpylap tasýǵa týra keledi degen sóz.
Osy maqalany jazyp otyrǵanda esime bir jaıt oraldy. Osydan birneshe jyl buryn gazetimizdiń Qostanaı oblysyndaǵy menshikti tilshisi N.Járimbetova osy avtovokzal tóńireginde týyndaǵan daýǵa qatysty problemaly maqala jazǵan bolatyn. Sonda avtovokzaldyń qazirgi qojaıyny avtovokzal mańyndaǵy alańnyń («prıvokzalnaıa ploshad») bóten bireýge satylyp ketkenin, sonyń saldarynan aınaladaǵy jer kóleminiń tarylyp qalǵanyn, avtokólikterdiń árili-berili qozǵalysynyń qıyndap ketkenin aıtyp shaǵymdanǵan eken. Sol aıtqan sóz ras bolyp shyqty.
Bir qyzyǵy, osy avtovokzaldyń ózi jolaýshysyz qalyp otyrǵan búgingideı kúni bireýler jańadan taǵy bireýin salamyz dep búırekten sıraq shyǵarypty. Bul endi kúlkili jaǵdaı bolatyn. Áıteýir, álgiler isteriniń qısynsyz ekenin túsinse kerek, keıin óz oılarynan bas tartqan.
Qalaı degende de, Qostanaı avtovokzalynyń mańyndaǵy kórinis óte kóńilsiz. Bizdi onnan astam aýdany, júzdegen eldi mekenderi bar óńir turǵyndary oblys ortalyǵyna qalaı jáne nemen qatynaıdy degen másele oılandyrdy. Olaı deıtinimiz, oblysqa qarasty Amankeldi, Jangeldın, Naýryzym aýdandarynda temir jol degeniń atymen joq, bolǵan da emes. Sondyqtan ol jaqtardyń halqy tek avtokólikpen ǵana qatynaı alady. Ras, bul atalǵan óńirlerde turǵyndar sany da óte kóp emes. Sonyń ózinde de negizinen qazaq ultynyń ókilderi turatyn úsh aýdanda kem degende 60-70 myńdaı halyq bolýǵa tıis. Olardyń jaǵdaıy qalaı bolmaq?
Abyroı bolǵanda, avtovokzaldyń qazirgi qojaıyny jolaýshylar kóńilinen shyǵý úshin qoldan kelgenniń bárin jasap jatqan syńaıly. Ashanasy, basqa da qajetti oryndary jumys istep tur. Biraq jolaýshylar sanynyń azdyǵynan túsetin tabys ta kóp emes bolsa kerek. Ǵımarattyń uzaq jyldar boıy jóndeý kórmegenin baıqap biz osyndaı baılamǵa keldik.
Bárin aıt ta, birin aıt, Qostanaı avtovokzalyndaǵy erterekte ózimiz kórgen kóńildi tirlik kózden bul-bul ushqan. Bul da bolsa sirá, adam taǵdyrynyń ózi qatań esepke baılanǵan naryq zamanynyń zańdylyǵy shyǵar...
Seıfolla ShAIYNǴAZY,
«Egemen Qazaqstan»
QOSTANAI
