Festıval ashylmas buryn Qazaqstan Respýblıkasynyń mádenıet jáne sport mınıstri Arystanbek Muhamedıuly, «Ulttyq kınematografııa óneri men ǵylymdary akademııasy» qoǵamdyq birlestiginiń prezıdenti Aıman Musaqojaeva, Astana qalasynyń ákimi Áset Isekeshev pen «Oskar» jáne «Altyn gloýbs» ıegeri Nıkolas Keıdj tal otyrǵyzyp, ıgi dástúrdi jalǵastyrdy.
«Osyndaı tamasha festıvaldi uıymdastyrýshy ujymǵa, mınıstrlikke alǵys aıtamyn. Eger kıno óner salasyna aralasýdy oılaǵan bolsańyz uzaq oılanyp qajeti joq, tek alǵa! Kıno óndirisine áýeli tózim qajet. Sodan soń kıno jasaqpen baılanys ornatý mańyzdy. Kez kelgen tabysty fılmniń kilti – komandalyq birlikte. Eger meniń oıymdy bilgilerińiz kelse, kınoǵa aınadaǵy óz beıneńizdi kórgendeı qarańyz. Osy jolmen júremin degen naqty sheshim qabyldaý talanttan da mańyzdy», degen Nıkolas Keıdj qazaqstandyq balalardyń bolashaǵyna sáttilik tiledi.
Festıvaldiń ashylý saltanatynda álemdik jáne otandyq kınoındýstrııanyń juldyzdarymen birge óner men sport salasynda úlgerimi úzdik balalar da boldy.
XIII Halyqaralyq «Eýrazııa» kınofestıvali Qazaqstan Respýblıkasynyń mádenıet jáne sport mınıstrliginiń tapsyrysymen «Ulttyq kınematografııa óneri men ǵylymdarynyń akademııasy» qoǵamdyq birlestigimen iske asyrylady. EKSPO-2017 kórmesine oraılastyrylyp ótip jatqan halyqaralyq kınofestıvaldyń «Mádenıetter kópiri» taqyryby otandyq kıno bıznestiń damýyna, sondaı-aq, kınofestıval demeýshileriniń ónimderin jarnamalaýǵa jol asha túsetini sózsiz.
Aıa О́MIRTAI,
"Egemen Qazaqstan"
