Astananyń irgesindegi «Qazanat» atshabaryndaǵy Etnoaýylǵa quddy Shyǵys Qazaqstan kóship kelgendeı. Bári osynda júr. Kómeıi búlkildegen ánshińizdi de, kúıshińizdi de, myń buralǵan bıshińizdi de, on saýsaǵynan óner tamǵan qolónershińizdi de, bilekti balýanyńyzdy da, júrekti aýdaryqpaqshyńyzdy da osy jerden kezdestirýge bolady. Mundaǵy arnaıy ázirlengen arheologııalyq kórmeden Berel, Shilikti qorǵandarynan tabylǵan 3 myńǵa jýyq jádigerlerdi tamashalaı alasyz.
Shyraıly Shyǵystyń túkpir-túkpirinen kelgen Aıman Boqbasarova, Aıbyn Jumataı, Gúlnár Qojamjarova, Natalıa Jýkova syndy qolóner sheberleriniń kıizden, aǵashtan, teriden jasalyp, shıden toqylǵan týyndylaryna tamsanyp, ózderimen tildesýge de múmkindik bar. Etnoaýyldyń bir tusynan Muztaý, Rahman qaınary, Marqakól, Qıyn kerish, Sibe kólderi, Alakól, Jıdebaı, Buqtyrma sý qoımasy sekildi óńirdiń kórkem jerleriniń fotosýretterin kórýge bolady. Etnoaýyldyń qaq ortasyndaǵy altybaqan mańyna kelip, Shyǵystyń bulbul kómeı ánshileriniń ánderin tyńdap, О́skemen men Semeıdegi teatr akterleriniń ónerin tamashalaımyn deseńiz marhabat. Al atshabarǵa barsańyz, aýdaryspaqtan elimizdiń 5 dúrkin chempıony, Azııa chempıony Ermek Jápishev bastaǵan, Erzat Arǵynov, Ádil Tókeshov, Farhat Qaıyrbekov syndy qazaq kúresi sheberleriniń ulttyq sport túrlerin pash etken qan qyzdyrar kórsetilimderiniń ústinen túsesiz. Sonymen qatar kún saıyn «Báıterek» monýmenti men «Jastar» saıabaǵynda Shyǵys Qazaqstannan shyqqan óner maıtalmandarynyń konsertin tamashalaýǵa bolady.
Oblystyń Elordadaǵy mádenı kúnderi 25 shildede EKSPO qalashyǵyndaǵy «Shyraıly Shyǵystan – ataǵy asqaq Astanaǵa» atty gala-konsertpen túıindelmek. Bul sharaǵa Qazaqstannyń Halyq Ártisi Roza Rymbaeva bastaǵan óńirdiń ózge de shyǵarmashylyq ujymdary qatysady.
Reti kelgende aıta keteıik, EKSPO kórmesi bastalǵannan beri ony 36 700 shyǵysqazaqstandyq turǵyn tamashalap úlgeripti. 23 shildedegi derekterge súıensek, oblys kórmeniń 89 700 bıletin satyp alypty. Kórmeni 26 000 bala (onyń 15 500-i az qamtylǵan otbasynan, 905-i – jetim, 3 750-i daryndy jáne 4 9595-i kolledj stýdentteri) tamashalaıtyn bolady. Bul maqsatta oblystyq bıýdjetten 419 mıllıon teńge qarjy qarastyrylypty.
Azamat QASYM,
«Egemen Qazaqstan»
