Basqosý dástúr boıynsha qos memlekettiń ánuranymen ashyldy jáne memlekettik týlary kóterildi.
Basqosýdyń resmı bóliginde Qazaqstan tarapynan Syrtqy ister mınıstriniń birinshi orynbasary Muhtar Tileýberdi sóz sóılep, búginde eki el arasynda senimdi baılanys ornaǵandyǵyn jetkizdi. «Dostyq pen ózara túsinistikke negizdelgen yntymaqtastyǵymyz shırek ǵasyr ishinde nyǵaıyp, ózara tıimdi sıpatqa ıe boldy. Parlamentaralyq yntymaqtastyǵymyz belsendi túrde damýda. Eki el arasyndaǵy dostyq jáne týystyq qarym-qatynastar Qazaqstandaǵy grek dıasporasy jáne Grekııadaǵy bizdiń azamattarymyz arqyly nyǵaıa túsýde», dedi ol. M.Tileýberdiniń aıtýynsha, Grekııa «jasyl» ekonomıkany damytýǵa eleýli úles qosyp kele jatqan memleketterdiń biri. Buǵan EKSPO-2017 kórmesindegi Grekııa pavılony dálel.
«Grekııa úkimeti qorshaǵan ortany qorǵaýǵa barynsha kúsh salyp, energııanyń balamaly kózderin qoldanýǵa kóńil bólýde. El pavılony ınteraktıvti jáne kreatıvti ekspozısııalar arqyly kórermenge ǵylymı-tehnıkalyq progrestiń ozyq úlgilerin, qoǵam men azamattar ıgiligi úshin tıimdi qoldanylýyn ári Grekııa tabıǵatynyń ásemdigin tamashalaýǵa múmkindik beredi. «Aýadaǵy energııa» atty pavılon Grekııaǵa tán tabıǵat pen landshaft erekshelikterin sıpattaıdy», dedi mınıstrdiń birinshi orynbasary.
Grekııanyń Ekonomıka jáne damý mınıstri Dımıtrıs Papadımıtrıý qos el arasyndaǵy baılanysqa 25 jyl tolǵandyǵyn aıtyp, elimizdiń halyqaralyq máselelerdi sheshýde belsendi ról atqaryp júrgendigin alǵa tartty. «Sońǵy shırek ǵasyrda Qazaqstanmen qarym-qatynasymyz turaqty damyp keledi. Búginde bul el XXI ǵasyrdyń birinshi on jyldyǵynda ekonomıkalyq áleýeti joǵary 25 eldiń qataryna kirdi. Sonymen qatar, Qazaqstan álemdik qoǵamdastyqtyń ajyramas bir bóligi jáne birqatar halyqaralyq problemalardyń sheshimderin tabýǵa belsendi qatysty. Qazaq eli kómirsýtegin óndiretin jetekshi memleket retinde Grekııa ınvestorlarynyń qyzyǵýshylyǵyn týdyrýda», dedi ol.
D.Papadımıtrıý Grekııanyń bes jylǵa sozylǵan aýyr daǵdarysqa ushyraǵandyǵyn áńgimelep, eliniń bul qıyndyqty eńsergenin qýanyshpen jetkizdi. «Sońǵy jyldary Grekııanyń buryn bolyp kórmegen ekonomıkalyq daǵdarysqa ushyraǵany ári onyń Eýropa men halyqaralyq ekonomıkaǵa áserin tıgizgeni málim. El bankrotqa ushyrap, Eýroaımaqtan shyǵyp qalýynyń da aıtarlyqtaı qaýpi boldy. Bul eýropalyq ıntegrasııa jónindegi kúsh-jigerge eleýli zalal keltiretin edi. 2009-2013 jyldardaǵy kezeń ishinde aýyr tıgen besjyldyq quldyraýdan keıin ekonomıka 3 jyl boıy turaqtylyq kezeńin basynan ótkerdi. Odan keıin ekonomıka qalpyna kelip, bıyl memleket daǵdarystan birjola shyqty. Barlyq synaqtardan keıin seriktesterimizdiń qoldaýymen elimizdiń damýǵa degen talpynysy oıdaǵydaı júzege asady dep senemiz. Biz Eýropany, Taıaý Shyǵysty jáne Azııany jalǵaıtyn energetıkalyq, tranzıttik ortalyqqa aınalǵymyz keledi», dedi mınıstr.
Búginde Grekııada qaıta qalpyna keletin qýat kózi 15 paıyz shamasynda. Olar 2020 jyly bul kórsetkishti 20 paıyzǵa jetkizbek. Balqan túbeginde ornalasqan el energııanyń basym bóligin jelden alady.
