«Bıyl bizdiń mekeme alǵash ret qala aýmaǵyndaǵy ózenderdi tazartý jumystaryn júrgize bastady. Tek bir aıdyń ishinde Esil ózeni men Aqbulaq pen Sarybulaqtan 63 tonna qoqys jınaldy. Onyń jartysy baldyr, al qalǵan jartysy temeki tuqyly, paket, plastıkalyq bótelkeler men basqa da turmystyq qaldyqtar», -dedi «Esil Astana» MKQK dırektory Qanat Alın medıa ortalyqtyń tilshisine bergen suhbatynda.
Alınnyń aıtýynsha, elorda aýmaǵyndaǵy sý joldaryndaǵy eń kóp qoqys Sarybulaqta jınalady. Atap aıtqanda N.Tilendıev kóshesinen bastap temirjolǵa deıingi aralyq eń kóp lastanatyn jer. Sebebi bulaqtyń tereńdigi keıbir jerde 20 sm bolsa, keıbir jerinde 1,5 metrge deıin jetedi. Ystyq kúnderi sý astyndaǵy ósimdikter kóbeıip, sonyń saldarynan sýdyń beti baldyr men shópterden kórinbeı qalady.
«Sarybulaq bulaǵynyń uzyndyǵy 16 shaqyrymdy quraıdy. Bulaqtyń Esil ózeninen Tilendıev kóshesine deıingi aýmaǵy taspen qaptalǵan, jıekteri qorshalǵan. Aldaǵy ýaqytta elordadaǵy barlyq sý joldarynyń jaǵalaryn jóndep, túzeý josparda bar», - dedi mekeme dırektory. Búginde Astana ózenderin tazartý jumysyna kún saıyn 50-ge jýyq jumysshy shyǵady.
Tehnıkany jetkizý múmkindigi bolmaýyna baılanysty Sarybulaqtaǵy tazalyq sharalary tek qolmen júrgiziledi. «Astana kúninen keıin Esil ózeniniń jaǵasynan 2 tonnadan astam turmystyq qaldyq jınadyq. Osy oraıda, qala turǵyndary men qonaqtaryna bizdiń jumysymyzǵa qurmetpen qarasa deımiz», - dedi Q.Alın.
