– Biraq ol aıtýǵa ǵana ońaı! – deıdi Batys Qazaqstan oblystyq perınataldyq ortalyǵy dırektorynyń emdeý isi jónindegi orynbasary Eset Eralın.
Shala týǵan balaǵa erekshe kútim kerek. Tymaqqa salyp, keregeniń basyna ilip qoıatyn baıaǵy zaman joq. Qudaıǵa shúkir, qazir perzenthanalarda ýaqytynan erte týǵan, túrli aýytqýy bar nárestelerge kútim kórsetetin medısınalyq apparattar bar ǵoı. Sonyń ózinde ómir men ólim arasyndaǵy arpalystan aman qalǵan árbir sábıdiń taǵdyry – dárigerler úshin zor jeńis, úlken qýanysh.
Perınataldyq ortalyqty aralap kelemiz. Eset Ǵabıtuly burylys-qaltarysy kóp uzyn dálizben júrip kelip, bir qabyrǵany alyp turǵan úlken sýretti taqtanyń aldyna toqtady. Taqtada shala týǵan, dúnıege kelgende salmaǵy az bolǵan sábılerdiń jańa týǵan kezindegi sýreti men keıin ósken kezdegi baqytty beınesi ilingen eken.
– Mynaý Andrıýshına, dúnıege kelgende salmaǵy 763 gramm ǵana bolǵan edi. Qazir 2,5 jasta. Al mynaý – apaly-sińlili Qurmashevalar, ómirge kelgen kezde úshem qyzdyń biri – 1280, biri – 1320, úshinshisi – 2400 gramm bolǵan edi, myna sýrette bı kóılegin kıip, boı túzeı qalǵanyn kórmeısiz be?! О́mirge 817 gramm bolyp kelgen Bernııazova, 718 gramm bolǵan Bekker de boı jetti. Salmaǵy 1 kelige jeter-jetpes bolyp kelgen Qajymuratova – qazir oqý ozaty. Jaryq dúnıe esigin nebári 876 gramm bolyp ashqan Ǵaınýllın da jigit bolyp qaldy, – dep tanystyra bastaıdy Eset Ǵabıtuly. Daýysynan maqtanysh seziledi.
Eset Ǵabıtuly – 2002 jyly M.Ospanov atyndaǵy Batys Qazaqstan medısınalyq akademııasyn bitirgen akýsher-gınekolog. Batys Qazaqstan oblysynyń Jańaqala aýdanynda, Oral qalalyq №2 perzenthanada akýsher-gınekolog, bosandyrý bólimshesiniń meńgerýshisi qyzmetin atqarǵan. 2015 jylǵy maýsymnan beri Batys Qazaqstan oblystyq perınataldyq ortalyǵy dırektorynyń emdeý jumysy jónindegi orynbasary.
Eset Ǵabıtulyn áriptesteri joǵary bilikti sanattaǵy dáriger akýsher-gınekolog retinde erekshe syılaıdy. «Jedel akýsherlik-gınekologııalyq kómek kórsetýde akýsherlik járdemniń barlyq túrin, júkti áıelder men bosanatyn áıelderdi konservatıvtik emdeýdiń taktıkasyn meńgergen. О́z jumysynda jańa medısınalyq tehnologııalardy paıdalanady. Birneshe ret ana men bala ómirine qaýip tóndirgen jaǵdaılarǵa qatysyp, mundaı jaǵdaılardan árqashan sátti nátıjemen shyǵyp keledi. Dırektordyń orynbasary laýazymynda eńbek ete otyryp, kásibı ujym qura bildi. Akýsherııa men gınekologııadaǵy synı jaǵdaılar kezinde kezek kúttirmeıtin kómek kórsetýdiń barlyq túrlerin meńgergen, óziniń kásibı deńgeıin únemi arttyryp otyrady» delingen eken keıipkerimizdi joǵary memlekettik nagrada usynǵan qujatta.
– Byltyr Aqsaı qalasynda oqys oqıǵa boldy. Bir kelinshektiń ústine qoqys konteıneri qulap ketken. Qol-aıaǵy synyp, basyna zaqym kelgen áıeldiń qursaǵynda alty aılyq balasy bar edi, - dep eske alady Eset Eralın.
Naýqas birden Aqsaı aýrýhanasyna jetkizilgen. Ol jerde alǵashqy medısınalyq kómek kórsetilgen soń Oral qalasyna ákelindi. Neırohırýrgter men travmatologter otalaryn jasap, áıel óz-ózine kelgen soń akýsher-gınekologtar bolashaq anany qamqorlyqqa aldy.
– Biz qursaqtaǵy sábıdiń jetilýin, ana men balanyń densaýlyǵyn muqııat baqylap, qoldan kelgenshe jaǵdaı jasadyq. Sóıtip, ýaqyty kelgende kesar tiligin jasap, sábıdi dúnıege ákeldik. Qudaıǵa shúkir, ana da, bala da aman! Bul oqıǵa dáriger qaýymyna úlken syn boldy, abyroımen ótkenimizge qýanamyz, – deıdi Eset Ǵabıtuly.
Keıipkerimizdiń osy salada eńbek etip júrgenine 14 jyldan asyp barady. «Kindigin kesken balalarym 2 myńnan asqan shyǵar», deıdi ol kúlip.
Qudaıǵa shúkir, jyl basynan beri perzenthanada ana ólimine jol berilgen joq. Bala týý kórsetkishi de jyl saıyn ósip keledi. Ortalyq mamandary jedel dárigerlik kómek qajet bolsa, oblystyń kez kelgen túkpirine attanyp ketýge daıar. Sanıtarlyq avıasııa arqyly akýsher-gınekologtar 2016 jyly 55 márte jolǵa shyǵypty. Bıyldyń ózinde 16 shaqyrtý bolǵan.
– Búginde ǵylym damydy, tehnologııa jetildi. Internet arqyly aýyl-aýdandaǵy áriptesterimizge kásibı keńes berý, aqyldasý ońaılady. Sanavıasııa kómegi de kez kelgen ýaqytta daıyn. Sondyqtan, óz tarapymyzdan ana men balaǵa kásibı medısınalyq járdem kórsetýge árqashan daıynbyz. Tek bizdiń bolashaq analarymyz tarapynan da jaýapkershilik kerek-aq. Júktilik kezeńinde ýaqytymen tirkeýge turý, ÝZI-den ótý, óz densaýlyǵyn kútý týraly bolashaq analarǵa aıtýdan, qaıtalaýdan jalyqpaımyz. О́ıtkeni ómirge perzent ákelýden, jańa adam ákelýden artyq jaýapty nárse joq qoı, – deıdi Eset Ǵabıtuly.
Qazbek QUTTYMURATULY,
«Egemen Qazaqstan»
ORAL
