EKSPO-2017 • 25 Shilde, 2017

Kórmege eki myń kenshi barady

203 ret

kórsetildi

2 mın

oqý úshin

Astanada ótip jatqan halyqaralyq EKSPO kórmesine bıyl jazda Rýdnyıdan eki myń kenshi barady. «Dóńgelengen dúnıe» qazir Astanada tur. Mundaı kórmeni kórý,tamashalaý – barlyq otandastar sekildi kenshilerdiń de armany. Eýrazııalyq toptyń «Komandalyq jaz–2017» jobasynyń aıasynda Sokolov-Sarybaı ken óndirý birlestigindegi kenshilerdiń alǵashqy toby – 500 jumysshy Astanaǵa attandy. Bul top óndiris ozattarynan, jastar tálimgerlerinen, jarystarda alyp kásiporynnyń namysyn joǵary kóterip júrgen sportshylar men qoǵamdyq jumys belsendilerinen, kásipodaq kóshbasshylary jáne jastardan quraldy.

Egemen Qazaqstan

Rýdnyılyq kenshilerdi saparǵa qalalyqtar ortalyq alańnan saltanatty túrde shyǵaryp saldy.

– Bul sizder úshin máńgi este qalatyn sapar bolady. Qazaqstannyń halyqaralyq EKSPO kórmesin ótkizý quqyna ıe bolýy, búginde onyń tabysty ótip jatýy bizdiń elimiz damýynyń bir aıǵaǵy der edim. El ekonomıkasynyń serpile damýyna úles qosyp júrgen ózderińiz. Bul sapardyń metallýrgter merekesimen tustas kelýi zor mańyzǵa ıe. Bizdiń elimizde beıbitshilik pen eńbek saltanat qurǵan,–dedi «SSKО́B» AQ áleýmettik máseleler men korporatıvtik mádenıet bóliminiń basshysy Aleksandr Makarenko.

Saparǵa shyqqandarǵa ıgi tilekti kásiporynnyń kásipodaq komıtetiniń tóraıymy Tatıana Sherstobıtova jalǵastyryp, olardyń Astanadan, EKSPO-dan jaqsy ásermen oralatyndaryna senim bildirdi. Kenshiler EKSPO kórmesine jaz boıy osylaı top-top bolyp baratyn bolady.
Sonymen qatar, Astanaǵa bıylǵy jazdyń aıaǵyna deıin Eýrazııalyq top quramyndaǵy ken kásiporyndarynan 6,5 myń kenshiniń joly túsedi. Olar Eýrazııalyq top ashqan akademııada oqıdy jáne EKSPO kórmesin tamashalaıtyn bolady.

Názıra JÁRIMBET,
«Egemen Qazaqstan»
RÝDNYI