Tabıǵattyń tylsym syrlarynyń bári de adam boıynan kórinis taýyp otyrady. Keıde keıbir adamdardyń bolmysynan aqylǵa syımaıtyn, sanaǵa baǵynbaıtyn qubylystardy da baıqap qalamyz. Mundaıda jaratylystyń jumbaǵyn janymyzben túsinip, kóńilimizben túısinip kórýge talpynýǵa týra keledi. Áıtse de árkim túsinip bolmaıtyn erekshe jaǵdaılar el arasynda jıi kezdesedi.
Aıryqsha darynymen eldi tańdandyryp, halyqtyń yqylasyna ıe bolǵandar kóp bolmasa da bar. Árıne mundaı jandarǵa kópshiliktiń tańdana ári qyzyǵa qaraıtyny sózsiz. Taraz qalasynda turatyn segiz jasar Nurdáýlettiń de eshkimde kezdese bermeıtin erekshe qabileti kópti tańdandyrmaı qoımaıdy. «Magnıt bala» atanyp ketken onyń boıynda magnıttik tartylys kúshi bar eken. Temirden jasalǵan kez kelgen kishigirim zattardy bala denesine jaqyndatqanda, týra bir magnıtke qoıǵandaı jabysyp qalady. Áýeli as qasyqtaryn jabystyryp kórgen ol búginde uıaly telefon, planshet sııaqty zattardy da keýdesinde ustap tura beredi. Endi tabıǵattyń mundaı ǵajaıybyna tańdanbasqa amal joq.
Nurdáýlet Taraz qalasyndaǵy №29 mektepte oqıdy. Bıyl ekinshi synypqa kóshken bala áýel bastan-aq óziniń alǵyr ári zerek ekenin baıqatypty. Sabaq úlgerimi de óte jaqsy. Balanyń alty jasynda oıanǵan erekshe qabiletin birinshi bolyp atasy Arystanbek baıqaǵan eken. Balanyń anasy Aıda onyń denesine jabysatyn temir quraldarynyń kún sanap artyp kele jatqanyn, tipti keıde ol mingen kóliktiń de júrmeı qalatynyn aıtady. Ári kún ótken saıyn eshkim túsinip bolmaıtyn qyrlarynyń ashylyp kele jatqanyn áńgimeledi. Degenmen, zerek ári aqyldy Nurdáýlet EKSPO-2017 kórmesin tamashalaý úshin Astana qalasyna saparlap ketipti. El mereıin asyrǵan aıtýly kórmege qyzyǵýshylyq tanytyp, tamashalaýǵa ketkeni de Nurdáýlettiń oılaý qabiletiniń ereksheligin tanytsa kerek.
Qalaı bolǵanda da, balanyń boıynda bir qasıettiń bary anyq. Áıtpese adamnyń denesine temirdiń jabysyp qalýy sırek qubylys qoı. Biraq adam balasy ómirde túrli tylsymdarǵa kýá bolady. О́mir barysy kútpegen ǵajaıyptardy alǵa tosady. Biz de búldirshinniń jolynyń ashyq bolýyn jáne ómirde jolynyń aq bolýyn tiledik.
Hamıt ESAMAN,
«Egemen Qazaqstan»
Jambyl oblysy
