1. «Astana» — «Legııa» arasyndaǵy eki matchqa qurylǵan strategııa, óz alańynda jáne qonaqta ártúrli fýtbol oınaý qanshalyqty mańyzdy? Eki klýb kelesi kezeń taǵdyryn birinshi oıynda sheshe ala ma?
2. «Astanany» birinshi oıynda qandaı esep qanaǵattandyrady?
3. «Astana» «Legııaǵa» qarsy oıynǵa daıyn ba?
Nurǵazy Sasaev, Astana qalalyq Fýtbol federasııasy saıtynyń bas redaktory:
1. «Legııa» sııaqty qarsylaspen barlyq máseleni birinshi oıynda sheshe salý múmkin emes. Qarsylasty jaqsylap zerttep, onyń osal tustaryn tabý qajet. Máselen, polıaktardyń oń qanat laterali aýyr qozǵalady, osy faktordy paıdalanýǵa bolady. Al jalpy, «Legııa» uıymdasqan komanda. Sátti qorǵanady, shabýylǵa jyldam kóshedi. Saıyp kelgende, Talǵat Baısýfınovten keńes alýǵa bolady. Ol basqarǵan tusta Qazaqstan quramasy Polshamen teń oınady, sol kezde «Legııanyń» birneshe fýtbolshysy oınaǵan bolatyn.
2. О́z alańymyzda kóbirek shabýylǵa shyǵyp, qorǵanysqa bekem turý kerek. «Astananyń» bapkerler shtaby óz alańynda jeńisti kózdep otyr dep oılaımyn. Menińshe, Iýrmalanyń «Spartagyna» qarsy jaýap oıynda «Astana» ádeıi báseń oınady, búkil kartasyn ashyp tastamaýǵa bekindi. Sol oıynda «Legııanyń» barlaýshylary trıbýnada otyrdy degen aqparattar bar. Sol matchtaǵy «Astananyń» oıyn sapasy polıaktardy aldandyrýǵa qaratylǵan manevr. Menińshe, «Astana» óz úıinde jeńis úshin oınaıdy, oǵan qol jetkizedi de. 2:0 bolady dep úmittenem. Bastysy — osy oıynda gol jiberip almaý.
3. Áli tolyq daıyn emes. Daıyn dep aıtýǵa bolmaıdy. Biz áli jańa oıynsha Marın Tomasovty kórgen joqpyz. Al vengr Laslo jaqsy oınap júr. Grahovas jaqsy bastap edi, qazir tipti kórinbeı ketti. Qorǵanys qyraǵy bolýǵa mindetti. Kóbinese eýrokýbogtarda astanalyqtardyń qorǵanysy óreskel qatelikter jiberip jatady.
Ánýar Ábdirahmanov, sports.kz respýblıkalyq sport portalynyń tilshisi:
1. Eń aldymen «Astanany» aýyr eki oıyn kútip turǵanyn atap óteıin. Bir oıynda eshqandaı másele sheshile qoımaıdy. Alǵashqy matchtyń óz alańymyzda ótýi polıaktarǵa qol kelýi múmkin. Al óz alańynda «Legııa» jankúıerleriniń kóz aldynda birinshi oıynda jibergen qatelikterin túzetý múmkindigi bar. «Legııa» — óte qıyn qarsylas. Eýrokýbogtyń ótken maýsymynda «Legııa» Chempıondar lıgasynyń toptyq kezeńinde oınap, «Real Madrıd» sekildi top klýbpen upaı bólisken bolatyn. «Astana» da osal emes, árıne, eýrokýboktarda birinshi jyl oınap jatqan joq. Bizdiń komanda kúshti qarsylastardy qalaı jeńýge bolatynyn biledi.
2. Birinshi oıynnyń «Astanaǵa» Varshavada ońaı bolatyn esebi — 3:0. Buǵan nátıjege qalaı qol jetkizýge bolatyny týraly Stoılov bas qatyrsyn.
3. Eýrokýbokta kez kelgen komanda óz múmkindikteri sheginen de artyq óner kórsetýi tıis. Bizdiń komandanyń problemalary bar, ol, Stanımır baspasóz konferensııalarynda únemi aıtatynyndaı, shabýylǵa sátti núkte qoıý. «Astana» ár oıynda qajetinshe qolaıly sát týyndatady, biraq olardy golǵa aınaldyrýda kemshin tustary baıqalyp jatady.
Naǵı Baqytbekov, kazfootball.kz jobasynyń jetekshisi:
1. «Legııa» — óte myqty qarsylas. Chempıondar lıgasy men Eýropa lıgasynyń toptyq kezeńderiniń turaqty qatysýshysy. Polshanyń sońǵy jyldaǵy turaqty chempıony. Biraq «Astana» da sońǵy 3 jylda aıtarlyqtaı jetile tústi, Eýropa tájirıbesin aldy, «alpaýyttardyń úreıi» atandy. Eki oıynǵa qurylǵan erekshe strategııa qajet degenge kelisemin. Úıdegi nemese qonaqtaǵy oıyn mańyzdy deýge bolmaıdy. Polıaktarmen ótetin eki oıynnyń arasynda elordalyq ujymnyń kúntizbesinde basqa oıynnyń bolmaýy óte mańyzdy. Eki oıynǵa qoıylǵan strategııaǵa qatysty aıtarym – «Astana» óz alańynda da, qonaqta da óz oıynyn oınaýy tıis dep sanaımyn. Menińshe, komandalardyń múmkindikteri 50/50.
2. Eýrokýbogtarda qashanda birinshi oıyndy syrt alańda ótkizgen jón dep esepteledi. Biraq jerebe birinshi oıyndy bizdiń alańǵa belgiledi, munda bastysy — gol ótkizip almaý. Qonaqtaǵy goldyń mundaı oıyndardaǵy máni joǵary, bizge birinshi oıynda 1:0 nemese 2:0 eseppen jeńý kerek. Al qonaqta qalaı oınaý kerektigin «Astana» klýby jaqsy biledi. Chempıondar lıgasynyń irikteý týrnırindegi Kıprdiń APOEL-ine qarsy oıyndy eske alyńyz. Sol kezde bizdiń komanda birinshi oıyndy óz alańynda ótkizip, 1:0 esebimen utty. Sodan keıin jankúıerlerdiń 80-90 paıyzy eki oıyn nátıjesi boıynsha kıprlikterge basymdyq berip, APOEL óz alańynda «Astanany» iri eseppen utyp, eshqandaı múmkindik qaldyrmaıdy degen edi. Al «Astana» qonaqta úlgili oıyn órnegin kórsetip, Eýropa chempıondar lıgasynyń toptyq kezeńine shyqqan bolatyn. Qazir de jaǵdaı solaı. «Legııa» favorıt, birinshi oıynda gol ótkizip almaý, múmkindiginshe kóp dop soǵý óte mańyzdy.
3. «Astana» daıyn. Bizdiń komanda tájirıbeli, elimizdegi úzdik bapkerler quramy osynda jınalǵan. Bizdiń taǵy bir basymdyǵymyz – qal el birinshilgi qyzý shaǵynda. Qazaqstandaǵy úzdik menedjment te — «Astanada». Jańa bıikterge shyǵý úshin barlyǵy daıyn.
