Al ul-qyzdaryn bas shaharǵa shyǵaryp salýǵa kelgen ata-analar el mereıin asyrǵan EKSPO halyqaralyq kórmesiniń el tarıhynda aıryqsha mańyzǵa ıe ekenin aıtyp, búgingi ıgi sharany uıymdastyrýshylarǵa alǵys bildirdi. Bas qalaǵa baǵyt alǵan balalar da aǵynan jarylyp, endi Astanany teledıdardan emes, óz kózderimen kóretinderine qýanyshty ekendikterin jasyrmady.
Bilim bóliminiń basshysy Múbárak Jınaqbaevanyń aıtýynsha, oqýshylarmen birge Astana qalasyna 8 jaýapty adam barady eken. Sondaı-aq, balalar úsh kún boıy kórmeni tamashalap, Astananyń ásem de kórikti jerlerin aralap qaıtady. Eń bastysy, oqýshylar kórmeni tamashalaý arqyly jazǵy demalystaryn este qalarlyqtaı etip ótkizedi.
Jalpy, Taraz qalasynda EKSPO kórmesin tamashalaýǵa baratyn oqýshylardan on top quralǵan. Endi tamyz aıynyń sońyna deıin qalǵan toǵyz lek Astana shaharyna baryp, kórmeni tamashalap qaıtatyn bolady.
Hamıt Esaman,
«Egemen Qazaqstan»
Jambyl oblysy
