Qazaqstan oqýshylarynyń arasynda ótkizilip jatqan olımpıada bastaýyn bir aı buryn alǵan. Oqýshylar óz jumystaryn 2017 jyldyń 15 qazanyna deıin http://olympiad.kz2050.kz saıty arqyly usyna alady. Jobanyń maqsaty - oqýshylar arasyndaǵy ınnovasııa jáne baǵdarlamalaýǵa degen qushtarlyǵyn nyǵaıtyp, ónertapqyshtardyń jańa urpaǵyn ósirý.
Saıys tórt baǵyt boıynsha ótedi: jasyl energetıka, aqparattyq tehnologııalar, modeldeý men robototehnıka, turmysqa paıdaly ónertabystar.
«Qazirgi tańda kóptegen baıqaýlar óz máresine jetkennen keıin dıplom tabystaýmen shektelip qalady. Al bizder 15 qarashada jeńimpazdardy anyqtaǵannan keıin, jumysty endi bastaımyz. Tańdalǵan úzdik jobalardy mentorlarmen birigip, oqýshylarǵa júzege asyrýǵa kómektesemiz. Biz 6 men 11 synyp arasyndaǵy oqýshylarǵa nazar aýdaryp otyrmyz», dedi joba uıymdastyrýshysy, «Qazaqstan - 2050» jalpyulttyq qozǵalysy» keńesiniń tóraǵasy Muhtar Mankeev.
Uıymdastyrýshylar aıtyp ótkendeı, sarapshylar irikteýinen ótken 10 jobanyń avtoryna bilim sertıfıkattary berilip, kýboktar tapsyrylady. Sonymen qatar, jeńimpazdarǵa qoldaý kórsetip, jobany ári qaraı damytý maqsatynda demeýshiler tarapynan mentorlyq jasaý kózdelgen. Mentorlardyń qatarynda ZeroToOneLabs.com stýdııasynyń negizin salýshy, programmıst Arman Súleımenov pen «I2BF Global» kompanııasynyń quryltaıshysy, bıznes-ınvestor Ádil Nurǵojın bar.
«Biz balaǵa jas kezinen kásipker atanýǵa kómekteskimiz keledi. Sebebi balalyq shaqta adamǵa túrli qyzyqty ıdeıalar men oılar keledi. Biz sony der kezinde baıqap, jobasyn júzege asyrýǵa kómektessek, bolashaqta úlken jetistikke jetetin kásipkerdi tárbıelep shyǵa alamyz. Al eger osyndaı azamattar elimizde kóp bolsa, memleket myqty bolady», dep málimdedi Ádil Nurǵojın.
«Qazirgi jastar jazǵy demalysqa qaramaı, eńbektenip, olımpıadaǵa qatysyp jatqandyǵy qýantady. Meniń oqýshylarǵa aıtarym, ótinish berýge qoryqpańyzdar, uıalmańyzdar. Sizdiń ıdeıańyz tek bastapqy satyda tursa da, biz usynysyńyzdy asyǵa kútemiz. Bul múmkindikti tolyqtaı paıdalaný kerek, sebebi siz qoǵamǵa paıdaly dúnıe jasap shyǵara alasyz», dedi Arman Súleımenov sóz barysynda.
Olımpıadany «Qazaqstan - 2050» jalpyulttyq qozǵalysy «Samruk-Kazyna Trust» áleýmettik jobalardy damytý qory men QR Bilim jáne ǵylym mınıstrliginiń qoldaýymen uıymdastyryp otyr. Oqýshylardyń jas erekshelikterin eskere otyryp, úmitkerlerdi 6-8 jáne 9-11 synyptar arasynda eki topqa bólip qatystyrý kózdelgen.
Aıgúl ShERNIIаZ
«Egemen Qazaqstan»
