Dúısenbi kúni Máskeý qalasynda AIBA Atqarýshy komıtetiniń kezekti otyrysy ótti. Onda 2019 jyly bokstan erler arasyndaǵy álem chempıonaty Reseıdiń Sochı qalasynda ótetin bolyp bekitildi. Doda «Aısberg» sport kesheninde ótedi.
Týrnırdi ótkizýge Túrkııa, Ýkraına, Taıland jáne Úndistan elderi úmitker bolǵan. Otyrysta AIBA prezıdenti Chıng-Kýo Vý: «2019 jyly Reseıde ótetin bokstan álem chempıonaty joǵary deńgeıde ótedi degen senimdemin. Reseı boks federasııasynyń basshylyǵy dodany uıymdastyrýǵa bar kúsh-jigerin salady. Álem birinshiligin joǵary deńgeıde ótkizetinine kúmánim joq», dep atap ótti.
Eske sala keteıik, Reseı erler arasyndaǵy álem chempıonatyn sońǵy ret 1989 (KSRO kezinde) qabyldaǵan bolatyn.
