Alań ıeleri á degennen-aq oıyn tizginin óz qolyna aldy. Bastapqy on mınýtta polıaktardy orta tustan uzata qoımady. Al 5-mınýtta Patrık Tvýmasıdiń esep ashatyn múmkindigi bolyp edi. Biraq onyń oń qaptaldan baǵyttaǵan doby ne soqqy ekeni, ne áriptesterine jibergen pasy ekeni túsiniksiz bolyp qaldy.
Bul kezdesý jaraqatsyz aıaqtalmaı qoımady. Kezdesýdiń 16-mınýtynda kezekti dopqa talas kezinde Djordje Despotovıch jaraqat alyp qalyp, alańnan ketýine májbúr boldy. Onyń ornyna Roman Murtazaev shyqty.
"Astananyń" bastapqy 25 mınýtta bir emes eki gol soǵatyn múmkindigi boldy. Dmıtrıı Shomko bastaǵan shabýyl da golmen aıaqtalýy tıis edi. Alaıda, sońǵy sátte Laslo Klıaınxaıslerdiń baǵyttaǵan soqqysy tym bıik ketti.
Al "Legııa" alǵashqy taımnyń ortasyna taman shabýyldaryn jıiletti. Nebári eki mınýttyń ishinde Mokın qaqpasynyń aldynda eki qaýipti sát uıymdastyrdy. Aldymen, 29-mınýtta Domınık Nagı Igor Shıtovtan aılasyn asyryp baryp dopty qaqpa mańaıyna jibergende, shabýyldy aıaqtaıtyn eshkim bolmaı qaldy. Artynsha, áýeleı kelgen aıyp dobyna da "Legııa" oıynshylary birinshi jetip, dál soqqy baǵyttaǵan. Biraq Aleksandr Mokınniń jankeshtiliginiń arqasynda gol soǵylmady.
Fýtboldaǵy "sen soqpasań saǵan soǵadynyń" keri kelip, "Astana" segiz mınýtta "Legııaǵa" eki gol darytyp úlgerdi. 37-mınýtta aıyp alańyndaǵy tartysty sátte kongolyq shabýylshy Jýnıor Kabananga jaqyn buryshty dál kózdep, alǵashqy goldy saldy. Al birinshi taımnyń aıaqtalýyna sanaýly sekýndtar qalǵanda Serikjan Mýjıkovtyń pasynan keıin Ivan Maevskıı shamamen 20 metr qashyqtyqtan týra soqqy baǵyttap, basymdyqty arttyra tústi.
Kezdesýdiń ekinshi 45 mınýtyn polshalyqtar jańa qarqynmen bastady. Bas bapkeri Iаsek Mageradan jańa nusqaýlar alǵany kórinip turdy. Tórshiniń ysqyryǵy estilisimen birden alǵa umtylyp, eki goldyń esesin qaıtarýǵa tyrysyp baqty. Al abdyrap qalǵan "Astana" fktbolshylary jankúıerleriniń qoldaýy arqasynda esterin jıyp, oıyndy aqyryndap óz qolyna ala bastady. Patrık Tvýması, Jýnıor Kabananga joıqyn soqqylaryn jıiletti. 55-mınýtta buryshtama dobynan keıin úshinshi gol da soǵylǵan edi, biraq sońǵy sátte Kabananga oıynnan tys qalǵan eken.
Jerlesterimiz munymen de toqtamady. 58-mınýtta Tvýması asqan jyldamdyqpen qarsy shabýylǵa shyqqan edi. Biraq sońǵy sátte kongolyq áriptesine dopty dál jetkize almady. Araǵa on mınýt salyp, "Legııany" úshinshi márte qapy qaldyratyn múmkindik týyp edi, bul joly da sáttilik joldas bolmady. Bul oıynda ádiletsizdik te oryn alyp jatty. Alǵy shepte óner kórsetken eki shabýylshymyzdy qaqpa mańynda túrli tásilmen qulatyp jatsa da arbıtr únsiz qalyp jatty. Tóreshiniń osyndaı sheshimine narazy bolǵan xalyq birge "penaltı" dep on bir metrlik aıyp dobyn belgileýdi talap etip turdy.
Matchtyń sońǵy on bes mınýtynda "Astananyń" qarqyny basylyp qalyp edi. Osyny utymdy paıdalanǵan varshavalyqtar 79-mınýtynda Armando Sadıkýdyń arqasynda esep aıyrmasyn qysqartyp ketti. Al qalǵan ýaqytta Stanımır Stoılov osy esepti saqtaýdy jón kórip, shabýyl shebinde júrgen Roman Murtazaevtyń ornyna Evgenıı Postnıkovty shyǵardy. Degenmen, kezdesýdiń aıaqtalýyna sanaýly mınýttar qalǵanda Patrık Tvýması úshinshi goldy salyp, Varshavadaǵy oıynnyń aldynda basymdyqty arttyrdy.
Aıan ÁBDÝÁLI,
"Egemen Qazaqstan"
