Jaqsy oıyn kórsettik, josparymyzdy júzege asyra bildik. Biraq bul matchta múmkindikterimizdiń tek 50 paıyzyn ǵana paıdalandyq. Ekinshi oıyn syrt alańda ońaı bolmasy belgili. Bul matchta da osy qalpymyzda oınaýǵa tyrysamyz. «Legııanyń» talanatty oıynshylary bar ekeni belgili boldy.
Stadıondaǵy jankúıerlerdiń qoldaýy jeńiske qanshalyqty áser etti dep oılaısyz?
Bizdi qoldaǵan jandarǵa alǵysymyz sheksiz. О́z alańymyzda on ekinshi oıynshymyzdyń qoldaýy jeńiske úlken áserin tıgizdi.
Tóreshiniń keıbir sheshimderine narazy emessiz be?
Men tóreshini synaǵandy unatpaımyn. О́z basym Kabanangany betinen uryp qulatqan sátti ǵana anyq kóre aldym. Al qalǵanyn baıqap úlgermedim.
«Spartakqa» qarsy ekinshi oıynnan keıin «Astana» bosańsyp qalǵandaı boldy. Al bul matchta basqa komandany kórgendeı boldyq.
Jigitterimiz jınaqy oınap, qarsy shabýylǵa ýaqytynda shyǵyp turdy. Biraq qaqpamyzǵa gol jiberip alǵanymyz bizge qıyndaý bolyp tur. Ekinshi oıyn ońaı bolmasy anyq.
Despotovıch jaraqat alyp qaldy. Onyń jaǵdaıyn qanshalyqty baǵalaısyz?
Despotovıchtiń jaǵdaıy qıyndaý sııaqty. Onyń qatardan shyǵyp qalǵany mańyzdy sátte qıyn bolǵany anyq.
Varshavada qandaı oıyn kútemiz? Komanda qorǵanysqa kóbirek kóńil bóle me, álde..?
Varshavada bizdi naǵyz syn sáti kútip tur. Biz osy matchtaǵy deńgeıde oınaý úshin barymyzdy salamyz. Osy kúnge deıin naqty qorǵanysqa jatyp alǵan emespin.
Varshavada neden qaýiptenesiz?
Eń birinshi óz komandamnan qaýiptenemin. Bári búgingideı ótse nur ústine nur bolar edi.
Roman Murtazaev pen Evgenıı Postnıkovty almastyrýyńyzdyń basty sebebi nede?
Murtazaev talantty ári jas oıynshy. Alǵashqy taımda jaqsy oınaǵanmen, ekinshi taımda shabýylǵa der kezinde ilese almaǵanyn baıqadym. Sondaı-aq, qorǵanysymyz da azdap syr bere bastaǵandaı boldy. Sol úshin Postnıkovty shyǵarýdy jón kórdim. Biraq bul tek qorǵanysqa jatyp alýdy kózdegenim emes edi. Áli de bolsyn múmkindikterimiz bolatynyn bildim. Baıqasańyzdar úshinshi gol soǵylǵannan keıin de oıynshylarym qarymta shabýylǵa shyǵyp jatty.
«Astananyń» osyǵan deıingi Eýropada oınaǵan qarsylastarynan «Legııany» kimniń deńgeıine saı dep oılaısyz?
«Seltıkpen» bir deńgeıde dep oılaımyn.
Osyndaı mańyzdy kezde Despotovıch jaraqat alyp qaldy. Al «Tobylǵa» Jalmuqan men Lýlakýdy jalǵa bergenderińizge ókinbeısiz be?
Transferlik tereze 10 shildede jabylady. Osyǵan deıin Tomasov qosylyp úlgeredi dep oılaıdyq. Sonymen qatar, shabýylda oınaıtyn taǵy bir oıynshy alamyz dep josparladyq. Biraq sońǵy sátte bul oıymyz da júzege aspady.
Mokın, Tvýması, Kabananga jaqsy óner kórsetti. Kimdi úzdik dep oılaısyz?
Úzdik «Astana» komandasy!
Aıan ÁBDÝÁLI,
"Egemen Qazaqstan"
