Elordaǵa júk artqan otyz botaly túıe jetelegen ónerpazdar, elýge tarta atty qyz-bozbala bastaǵan «Uly Jibek joly. Kóne Tarazdan Astanaǵa tartý» atty etnomádenı kerýen keldi. Tarıhı meken Tarazdan ásem Astanaǵa eki aıdan asa júrip jetken olar jol boıy on beketke aıaldap, ultymyzdyń umyt bolǵan salt-dástúrlerin pash etken. Kerýenmen kelgen ónerpazdar men sport sheberleri endi aı sońyna deıin bas shaharymyzda EKSPO-2017 halyqaralyq kórmesi aıasynda Jambyl oblysynyń mádenı kúnderin ótkizedi.
«Han Shatyr» saýda jáne oıyn-saýyq ortalyǵy mańyndaǵy «Ǵashyqtar» saıabaǵyna kelip toqtaǵan kerýendi qarsy alýǵa Astana ákimi Áset Isekeshev, Jambyl oblysy ákimi Kárim Kókirekbaev jáne sol topyraqta týǵan zııaly qaýym ókilderi keldi. Basqosýda óńirge qarasty on aýdannyń kórkemónerpazdary «Áýlıeatadan jyr shashý» atty konsert qoıdy.
«Eki myń jyldan asa tarıhy bar qasıetti Áýlıeata jerinen, jyr alyby Jambyldyń elinen 1400 adam Astanaǵa keldi. Etnomádenı kerýen 20 mamyr kúni Taraz qalasynan jolǵa shyǵyp, Jambyl oblysynyń alty aýdany men Qaraǵandy oblysynyń tórt aýdanyn basyp, jol boıy mádenı sharalar ótkizip, eki aı degende Astanaǵa taban tiredi. Bul – bizdiń óńirdiń EKSPO-2017 halyqaralyq kórmesine eń úlken tartýy. Kerýen quramynda eki júzge tarta tanymal ónerpazdarymyz bar», degen oblys ákimi kerýen tobynyń 1300 shaqyrym joldy basyp ótkende qıyndyqtarǵa da kezikkenin jetkizdi.
«Árıne, Arqanyń tósine kóne shahardan at, túıemen, arbamen ashyq aspan astynda jetý ońaı emes. Ásirese, eki apta burynǵy aptap ystyq kezinde temperatýrasy 46-47 gradýsqa deıin kóterilgen Moıynqum dalasynan ótý ónerpazdarǵa da, maldarǵa da qıynǵa soqty. Biraq sol mashaqattyń bárin jeńip, Astananyń qaq tórine jettik», dedi Kárim Kókirekbaev.
«Ǵashyqtar» saıabaǵynda Jambyl oblystyq tarıhı-ólketaný mýzeıiniń «Taraz – tarıhtyń altyn dińgegi» atty kórmesi ótip, saq dáýirinen Qazaq handyǵy qurylǵanǵa deıingi 300-den astam jádiger – tarıhı ınstallıasııalar, tıyndar, qumyralar jáne tarazdyq qylqalam sheberleriniń sýretteri jurtshylyq nazaryna usynyldy. Sondaı-aq, «Kóne Taraz álemi» tarıhı-mádenı ekspozısııalyq kesheni ashylyp, kıiz úıler tigildi. Qoldan jasalǵan áshekeı buıymdar, mýzykalyq aspaptar, jemis-jıdekter men kókónister satylymǵa shyǵaryldy.
Aısha Bıbi men Qarahan, nemeresine ertegi aıtyp otyrǵan áje jáne qus ushyryp, tazy júgirtken ańshylardyń sáni men saltanaty jarasqan kerýen Astana turǵyndary men qonaqt+aryna umytylmas áser syılady. «Bul esten ketpeıtin erekshe sapar boldy. Bizdi jol boıyndaǵy árbir aýyl qýanyshpen qarsy aldy», deıdi kerýen quramyndaǵy ájeı Tamara Ábdikárimova.
EKSPO-2017 kórmesi aıasynda 30 shildege deıin jalǵasatyn mádenı kúnderde elordalyq turǵyndar men qonaqtar oblystyq fılarmonııa ujymynyń «Áýlıeatadan – án shashý» baǵdarlamasyn, qazaq drama teatrynyń «Qyz Jibek» saýndtregin, A.Bekbosynnyń «Domalaq ene», S.Balǵabaevtyń «Eń jaqsy erkek» spektaklderin, «Alataý» folklorlyq ansambliniń «Ǵasyrlar áýeni» konsertin jáne D.Tańatarov, Q.Nurtas, I.Rasylhan syndy tanymal ánshilerdiń qatysýymen ótetin «Bir áýen, bir óleń» keshin tamashalaıdy. Mádenı sharalardyń kópshiligi «Ǵashyqtar saıabaǵynda» ótedi.
Bas qaladaǵy «Qazanat» ıppodromynda ulttyq at sporty túrleri – kókpar, aýdaryspaq, teńge ilý, jamby atý oıyndarynyń kórsetilimderi uıymdastyrylady. «Etnoaýyl» qalashyǵy mańynda qazaq kúresi, asyq atý, bes tas, alańdaǵy toǵyzqumalaq oıyndarynyń kórsetilimimen qatar, qusbegilik jáne tazy, tóbet ıtter kórmesi ótedi.
Sonymen birge, 28-30 shilde kúnderi jambyldyqtar «Qazaqstan» sport kesheni aýmaǵynda aýylsharýashylyq jármeńkesin ótkizip, astanalyqtarǵa 245 tonna ekologııalyq taza, joǵary sapaly azyq-túlik ónimderin usynady.
Ashat RAIQUL,
«Egemen Qazaqstan»
Sýretterdi túsirgen
Orynbaı Balmurat,
«Egemen Qazaqstan»
