Búgin Qazaq Ulttyq óner ýnıversıtetinde Gollıvýd aktery Djon Malkovıch BAQ ókilderimen baspasóz máslıhatyn ótkizdi. Kúni keshe ǵana sheteldik qurmetti meıman «EKSPO-2017» kórmesin aralap qaıtqan bolatyn. Halyqaralyq kórmeden alǵan áserimen bólisken akter Qazaqstan jáne Fransııa pavılondarynda bolǵan.
«Kórmeni tamashalaý úshin kóp ýaqytym bolǵan joq. Degenmen, kórgenderim meni keremet tamsandyrdy. Kórmeniń sáýleti keremet. О́zim de sáýlet salasyn zerttep júrgendikten, kórme meni erekshe qyzyqtyrdy. Biz Qazaqstannyń pavılonynda boldyq. «EKSPO-2017» kórmesi bolashaq energııasy máselesin kóterip jatqanyn bilemin. Bir sózben aıtqanda, bári keremet. Robottar kórmesin tamashaladym. Qazaqstan maǵan óte unaıdy. Eki qalada - Almaty men Astanada boldym. Qazaqstandy qýana-qýana aralap shyǵar edim. 6-8 jyl buryn dosym aralap shyqqan. Sondyqtan, meniń de Qazaqstandy aralap shyǵýym múmkin», dedi Gollıvýd aktery.
Malkovıch osymen Qazaqstanǵa ekinshi ret kelip otyr. 2010 jyly ol Almaty qalasynda bolǵan. Akter elge kelmeı turyp, Qazaqstannyń tarıhyn aqtaryp shyqqan.
