Onyń aıtýynsha, áýe kemesi jerge tıgende apatqa ushyraǵan bolýy múmkin. Sondaı-aq Taıjanov atalǵan oqıǵaǵa baılanysty arnaıy komıssııa qurylyp, apat ornynda jumys jasap jatqanyn aıtty.
Eske sala keteıik, tótenshe jaǵdaı búgin tańerteń Panfılov aýdanynda Sholaqaı aýylyna jaqyn jerde bolǵan. Júgeri egistigin óńdeýge shyqqan IаK-12 ushaǵy qulap, artynan órtene bastaǵan. Bortta ushqysh pen taǵy bir adam bolǵan. Ekeýi de qaza boldy.
Qazir oqıǵa ornynda Taldyqorǵan kólik prokýrory, Almaty-1 stansasy Ishki ister Jelilik bólimi, Altynkól stansasynyń jelilik bólimi, Panfılov aýdandyq TJD mamandary jumys istep jatyr.
Atalǵan derek Almaty áýejaıynyń QR QK 344-babynyń 3-bólimi boıynsha sotqa deıingi tergeý isiniń biryńǵaı tizilimine tirkeldi. Mınıstrlik tótenshe jaǵdaıdyń sebepterin anyqtaý úshin tekserý jumystary týraly buıryq shyǵarmaq.
Mamandardyń aıtýynsha, atalǵan ushaqtyń ushýǵa qajetti barlyq qujattary bolǵan.
