15 fılmnen týratyn kınofestıval baǵdarlamasynda Qazaqstan, Reseı, Qytaı, AQSh, Fransııa, Germanııa, Shvesııa, Belgııa, Norvegııa, Nıderlandy, Chehııa, Slovakııa, Horvatııa, Iran, Jańa Zelandııa jáne ózge de elderdiń shyǵarmashylyq toptary óz jumystaryn usyndy.
Atap aıtqanda, negizgi konkýrstyq baǵdarlamaǵa «Qazaq eli» (Qazaqstan), «Kelıleh pen Demneh» (Iran), «Sulýlyq» (Jańa Zelandııa, Qytaı), «Úıde jalǵyz ózi» (Gonkong), «Elfter taǵy» (Qytaı, AQSh) fılmderi qatysty. Al konkýrstan tys baǵdarlmada «Tańǵajaıyp Patars» otbasy (Fransııa), «Bult bala» (Belgııa, Shvesııa, Norvegııa, Nıderlandy), «Ákeden de artyq» (Germanııa), «Mıster Qurbaqa» (Nıderlandy), «Nellıdiń basynan keshkenderi» (Germanııa), «Offlaın: kelesi deńgeıge daıynsyń ba?» (Germanııa), «Perishte 2» (Chehııa), «Syıqyrly qalam» (Reseı), «Shulyq jutqyshtar» (Chehııa, Slovakııa, Horvatııa) týyndylary baq synady.
Marapattaý rásiminiń aldynda kınofestıval qonaqtary men qatysýshylar qyzyl kilemniń ústimen júrip ótti.
Baıqaýdyń bir ereksheligi – qazylar alqasy daryndy mektep oqýshylarynan quralǵan. Olar bes kún boıy festıvalge qatysqan fılmderdi baǵalap, úsh nomınasııa boıynsha jeńimpazdardy anyqtady.
Osylaısha, qazylar alqasynyń sheshimimen «Bes qurlyq» halyqaralyq balalar kınofestıvalinde «Eń úzdik bala róli» nomınasııasyn «Sulýlyq» (Jańa Zelandııa, Qytaı) fılmi jeńip aldy.
«Eń úzdik ssenarıı» nomınasııasy boıynsha «Qazaq eli» (Qazaqstan) fılmi jeńimpaz atandy. Al «Perishte 2» (Chehııa) týyndysy kınofestıvaldiń «Eń úzdik fılmi» dep tanyldy.
«Bizdiń negizgi maqsatymyz osy balalardy tárbıeleý. Olardyń boıyna Otanǵa degen súıispenshilikti, adamgershilik qasıetterdi, ata-babalarymyzdan mura bolyp kele jatqan salt-dástúrlerimizdi osy óner arqyly sińire alamyz. Sondyqtan balalarymyzdyń ónerge degen talpynystaryn arttyrýǵa, tájirıbe jınap, bilimderin jetildirýge múmkindik beretin osyndaı festıvaldar jıi bola bersin», – dedi «Eń úzdik bala róli» nomınasııasy boıynsha júldeni tabys etken QR eńbek sińirgen ártisi, Astana Sırkiniń dırektory Erik Joljaqsynov.
Aıdar О́risbaı,
«Egemen Qazaqstan»
