«Jaqsyny kórmek úshin» dep jýyrda Álimbaı Sherýbaevtyń aýlasyn baryp kórýge de jol tústi. Rasynda atshaptyrymdaı keń aýla jemis aǵashy men saıaly aǵashqa toly eken. Kireberis mańda japyraǵy jaıqalǵan kóktal qoıý kóleńkesimen búrkep, shatyrly úıge ystyqty jibermeı tursa, onan beri jaǵalaı bizdiń óńirge endi jersine bastaǵan onshaqty týıa aǵashy aýlanyń sánin kirgizip tur.
– Al myna aǵash – ásem tal dep aıtylady eken, erte kóktemde ádemi gúl shyǵarady da, sonan soń baıyz tabady. Pildiń qulaǵyndaı úlken japyraqtaryn kórdiń be, aýany jelpip, tazalap turady, – deıdi baǵbandyqqa moıyn burǵan otaǵasy.
О́zimiz meken etetin Syr óńiri rasynda shóleıt jáne jartylaı shóleıt aımaq ekendigin jasyra almaımyz ǵoı, kúniniń kózi ótkir, shań sýyratyn jeli de oqtyn-oqtyn bar ekendigin bildirip qoıady. Sondyqtan da ár úı ıesiniń óz aýlasyna túrli jemis pen saıaly aǵashtar egýi óte qajettilik dep túsingen jón. Astana qalasynyń mańyna qanshama gektar jerge túrli aǵashtar otyrǵyzýǵa pármen berip, jasyl beldeý ornatqyzǵan Prezıdentimizdiń ıgi isi elge qanshama sharapat shashyp tur emes pe?! Ýaqyty qansha tyǵyz bolsa da, ony nazarynan tys qaldyrmaǵan Elbasy ár óńirdiń ósip órkendeýi jalpy eldiń kórkeıýine aparatynyn ár jıynda qadap aıtyp, atqarýshy oryndarǵa tapsyryp, elge úlgi kórsetýmen keledi. Mine, osy oraıda búgingi keıipkerimizdiń isine súısinis bildiremiz. Endi shamaly ýaqytta jetpis jastyń jalyna qol artatyn aýylsharýashylyq salasynyń ardageri Álimbaı Sherýbaev zeınetkerlikke shyqtym dep, tórdiń tóbesinde shaljıyp jatýdy ádet qylmaǵan adam. Tańǵy saǵat 6-dan ornyna turady da, baý-baqshasynyń kútimine kirisedi. Sonaý 9-ǵa deıin tynym joq, erteńgilik sháılanyp alǵan soń, taǵy da ketpen-kúregin alyp, qalypty sharýasyna kirisedi. «Jańa óziń aralap kórgen aýladaǵy 151 aǵash pen 33 atyz jońyshqany birsypyra sýarý úshin 11 kún ýaqytym ketedi. Sonda aıyna úsh retten sýarady ekenmin. Onyń arasynda otaq shabý, jetilgen jońyshqany oryp jınaý sekildi sharýalarym bastan asady, – deıdi ol shattana sóılep. Mine, sóz basynda adam qumartqan isi qansha aýyr, qıyn bolsa da lázzat alady eken dep jatqandyǵymyz sondyqtan edi.
Álekeńniń aýlasynda álginde ózimiz tilge tıek etken aǵash túrlerine taǵy aınalyp soǵar bolsaq, 20 túp júzim bıyl alǵashqy jemistiń nyshanyn kórsetti. Almanyń sany – 24, shabdaly – 2, órik 8 túp bolsa, munan ózge onshaqty túp shıe taly bar. Aıtpaqshy, aýlanyń syrtqy qabatyndaǵy 14 túp kókjıdeniń ıisi burqyrap, aınalany kóriktendirip turǵany bar. Batyr tulǵaly aǵamyzdyń jeńgemizge degen qurmeti de erekshe eken: «Myna gúlderdi Sáýle jeńgeń ekken, myna qııar men qyzanaq ta sol kisiniń eńbegi», dep qoıady. Taǵy bir atyzda qyzylsha qaptap tur eken, ony da jeńgemizdiń qyzmetine jatqyzdy Álekeń.
Jańaqorǵandyqtar jaqsy biledi kezinde Álimbaı Sherýbaev sovhozǵa basshylyq jasaǵan eń jas dırektordyń biri boldy. Nebári 32 jasynda qıyr shettegi Qaratóbe aýylyna, KPSS-tiń HHIV sezi atyndaǵy sovhozǵa dırektor bolyp taǵaıyndaldy. Janyna bilikti mamandar agronom Asan Naqyshpanov, gıdrotehnık Ábjappar Qudaıbergenov, mal sharýashylyǵynyń brıgadıri Qulmaǵanbet Isahanov syndy jastardy toptastyrǵan dırektor keńshardy 1994 jyly 1 mln 200 myń teńge paıdaǵa shyǵardy. Onan keıingi ýaqyttarda Qyrkeńse aýylynda aýyl ákimi, Kelintóbe kooperatıviniń tóraǵasy, aýdandyq jer bóliminde bas maman qyzmetterin atqarǵan ol 2014 jyly zeınetkerlikke shyqty. Sonan beri baý-baqshanyń baǵbandyǵymen shuǵyldanyp júr. Aıtpaqshy, aýdan ortalyǵyna ornyqqan sońǵy onshaqty jyl kóleminde jas kezindegi ózi súıetin voleıbol sportyna den qoıdy. Aýdandyq ardagerler komandasynyń beldi múshesi. Jaz aıynda Almatyǵa arqaly aqynymyz Oljas Súleımenov atyndaǵy týrnırge qatysyp, ózimen de júzdesip qaıtty.
Iá, ómirdi mándi de, maǵynaly ótkizý ár adamnyń óz qolynda. Sonyń jarqyn úlgisin jańaqorǵandyq Álimbaı Sherýbaevtyń ómir jolynan baıqar edik.
Nurmahan ELTAI
Qyzylorda oblysy,
Jańaqorǵan aýdany
