Eki jaqty kelissóz Qazaqstan men Rýmynııa dıplomatııalyq qarym-qatynasynyń ornaýyna 25 jyl tolýyna oraı ótkizildi. Mereıtoıly kezdesýden keıin mınıstrler buqaralyq aqparat quraldary ókilderine málimdeme jasady.
«Biz yntymaqtastyqtyń eki jaqty jáne kóp jaqty máselelerin talqylap, saýda-ekonomıka jáne ınvestısııa salalaryndaǵy ózara árekettestiktiń kókjıekterin belgiledik. Eki eldiń áleýeti jetetin tranzıttik-kóliktik qatynasty tıimdi paıdalanýǵa qatysty yntymaqtasý máselelerin qaradyq. Búgingi tańda energetıka salasyndaǵy yntymaqtastyq saýda jáne ekonomıkalyq baılanysymyzdyń basym tarapy bolyp sanalady. Alaıda buǵan qaramastan saýda salalaryn keńeıtý jáne ony keń taraptandyrý bizdiń basty mindetimiz», – dedi Qaırat Ábdirahmanov.
Mınıstrdiń pikirinshe, Qazaqstan tarapy eldi jandandyrýǵa arnalǵan jobalarǵa rýmyn bıznes ókilderiniń qatysqanyna múddeli kórinedi. Sonymen qatar, eki el arasyndaǵy mádenı jáne ǵylymı sabaqtastyqty damytý úshin shákirt almastyrý boıynsha oqıtyn stýdentter sanyn ulǵaıtý, akademııalyq sala mamandarynyń jıynyn ótkizý sekildi qadamdar jasalatynyn aıtady Qaırat Ábdirahmanov.
Qazaqstan Syrtqy ister mınıstriniń aıtýynsha Rýmynııa Balqan túbegindegi eń mańyzdy áriptes bolsa, óz kezeginde Teodor-Vıorel Meleshkan Qazaqstandy Orta Azııadaǵy teńdessiz seriktes dep esepteıtini jetkizdi.
«Meniń is-saparym naqty nátıjeler ákelgenine qýanyshtymyn. Biz dıplomatııalyq qarym-qatynastyń ornaýyna 25 jyl tolýyna oraı Rýmynııa saýda palatasy men «Atameken» ulttyq kásipkerler palatasynyń áriptestigi týraly kelisimge qol qoıdyq», – dedi Rýmynııa Syrty ister mınıstri Teodor-Vıorel Meleshkan.
Ortaq kelisimge qol qoıylǵannan keıin Balqan túbeginen kelgen meımandar men Qazaqstan tarapy «EKSPO-2017» halyqaralyq kórme aıasynda ótip jatqan Rýmynııa kúnderin tamashalaýǵa attandy.
Abaı Asankeliuly,
«Egemen Qazaqstan»
