Ulttyq ekonomıka mınıstrliginiń málimeti boıynsha, «Nurly jol» baǵdarlamasynyń aıasynda avtojol salasyn damytý baǵytynda 17 joba júzege asyrylýda. Sonyń ishine 312 shaqyrymdyq «Taldyqorǵan - О́skemen» jáne uzyndyǵy 184 shaqyrym bolatyn «Úsharal-Dostyq» avtojoldary da engizilip otyr.
Qazirgi kezde atalmysh avtomobıl joldaryn jóndeýdiń jobalyq-smetalyq qujattary daıyndalyp, zertteý (ızyskatelnyı) jumystary júrgizilýde.
Alakól týrızmi úshin ınfraqurylymdy damytý asa mańyzdy. Bul isti Elbasynyń tapsyrmasyna sáıkes oblys ákimi Amandyq Batalov erekshe nazarǵa alyp keledi. Máselen, buǵan deıin 2015 jyldan bastap «Jetigen-Dostyq-Jetigen» temir jol baılanysy memleket tarapynan sýbsıdııalaý negizinde qolǵa alynsa, bıylǵy jylǵy shildeniń 21-nen Astana men Taldyqorǵannan Úsharalǵa áýe qatynasy ashylǵan bolatyn. Endi oǵan qosa Taldyqorǵan men Úsharaldyń arasyndaǵy avtomobıl joly jóndelse, týrızm úshin úlken múmkindik bolmaq.
