Jyl saıyn «Operalııaǵa» qatysý úshin júzdegen úmitker ótinim beredi, olardyń ishinen tek 40 adam ǵana halyqaralyq ádilqazylar aldynda óner kórsetý úshin tańdalady. Ár kezderi vokaldyq jarys álemniń túrli qalalarynda ótkizilip keledi. Osy jyly 17 elden kelgen ártister Astanaǵa at basyn burdy. Plasıdo Domıngo daýys berýge qatyspaıtyny belgili, biraq barlyq baıqaý kezeńinde ánshilerge belsene kómek kórsetedi: olardyń shyǵarmashylyǵy men ónerine qatysty aqyl-keńes berip, durys jolǵa baǵyttaıdy. Eń jas vokalısterdiń Plasıdo Domıngonyń Los-Andjeles (AQSh) pen Valensııada (Ispanııa) ashqan jastar baǵdarlamasyna qatysý múmkindigi bar. Biraq, osyndaı baqytqa ıe bolǵan jandy baıqaýdyń uıymdastyrý komıteti sheshedi.
Rolex kompanııasy «Operalııa» baıqaýyn osymen 16 jyl qatarynan maqtanyshpen usyna otyryp, óziniń ónerge máńgilik adal ekenin pash etedi. Plasıdo Domıngo 1982 jyldan bastap Rolex kompanııasynyń ókili bolyp tabylady, jáne Rolex kompanııasy kásibı kemeldenýge umtylǵan jas daryndy oryndaýshylardy qoldaý aıasyn keńeıtýge qýanyshty.
Dástúr boıynsha baıqaýdyń fınaldyq kezeńiniń resmı ashylýynan keıin P.Domıngo «Astana Opera» sımfonııalyq orkestriniń dırıjerlik pýltine jaıǵasty. Eger aldyńǵy kezeńderde qatysýshylardyń qazylar aldynda 2 týyndy oryndaý múmkindigi bolsa, aqtyq saıysta 14 qatysýshy bir operalyq arııadan ázirlegen.
Sarsýelany úzdik oryndaǵany úshin 5 qatysýshy-úmitker operettaǵa jaqyn osy ıspan mýzykalyq-sahnalyq janrynan bir arııadan oryndady. Nátıjesinde, Plasıdo Domıngonyń anasy, Pepıta Embıl de Domıngo syılyǵy jáne 10 myń dollar Adela Zaharıaǵa (soprano, Rýmynııa) buıyrdy, al maestro Domıngonyń ákesi, aǵa-Plasıdo Domıngo syılyǵy men 10 myń dollardy Marko Chaponı (tenor, Italııa) aldy.
Rıhard Vagner men Rıhard Shtraýs operalarynan repertýardy úzdik oryndaǵany úshin ataqty shved ánshisi Bırgıt Nılson atyndaǵy qosymsha júlde men 15 myń dollar kólemindegi aqshalaı qarajat Oksana Sekerınaǵa (soprano, Reseı) jáne Borıs Prıglge (bas-barıton, Chehııa) buıyrdy.
Opera arııalary men sarsýela shyrqalǵannan keıin, barlyq qatysýshylar Plasıdo Domıngo jetekshiligindegi «Astana Opera» orkestriniń súıemeldeýimen maestronyń uly, kishi-Plasıdo Domıngo jazǵan «Operalııanyń» resmı ánuranyn oryndady.
Fınaldyq kezeń aıaqtalǵan soń, ádilqazylar ǵana emes, sondaı-aq kórermenderdiń de súıikti qatysýshysyna daýys berý múmkindigi boldy. Aldyn-ala berilgen qyzyl jáne kók tústi kartochkalardy baıqaýǵa qatysýshylardyń sýretteri bekitilgen arnaıy qoraptarǵa tastady. Rolex kompanııasynyń ókili Rolex qol saǵaty túrindegi Kórermen kózaıymy júldesin Marııa Mýdrıak (soprano, Qazaqstan) jáne Leon Kım (barıton, Koreıa Respýblıkasy) tabys etti.
Operalııa qatysýshylarynyń deńgeıi jyl saıyn artýyna baılanysty, bəsekelestik te qyza túsýde, bıyl Astanada ótken baıqaýda maestro Plasıdo Domıngo aqtyq saıysqa jetken, biraq negizgi aqshalaı qarajatqa qol jetkize almaǵan ərbir qatysýshyny 5000 dollar kóleminde yntalandyrý syılyǵymen marapattaý týraly sheshim qabyldady. Yntalandyrý syılyǵyna: Rýpert Entıknap (kontrtenor, Ulybrıtanııa), Sý Ion Pak (soprano, Koreıa Respýblıkasy), Vlada Borovko (soprano, Reseı), Emmet O’Henlon (barıton, AQSh), Rýslana Koval (soprano, Ýkraına), Damıana Mıssı (soprano, Italııa) ıe boldy.
Adela Zaharıa (soprano, Rýmynııa) jáne Levı Sekhapan (tenor, Ońtústik Afrıka) opera óneriniń Halyqaralyq «Operalııa» baıqaýynyń birinshi júlde jeńimpazdary atanyp, eń joǵarǵy 30 myń dollar kólemindegi aqshalaı syılyqqa ıe boldy. Ekinshi oryn jáne 20 myń dollar marapaty Krıstına Mhıtarıanǵa (soprano, Reseı) jáne Davıde Djýstıge (tenor, Italııa) buıyrdy. Úshinshi syılyq pen 10 myń dollardy Marııa Mýdrıak (soprano, Qazaqstan) jáne Leon Kım (barıton, Koreıa Respýblıkasy) aldy.
- Kóptegen ánshiler daıyndalǵan, oqyǵan bolýy múmkin, biraq «Operalııa» bolmaǵanda olar týraly qashan málim bolaryn kim bilsin. Mine, bul «Operalııanyń» negizgi mindeti – álemge jańa ártisterdi tanytyp, olardyń ataqty etý, - dep atap ótti maestro Domıngo.
«Operalııanyń» qurmetti qonaǵy KSRO Halyq ártisi Bıbigúl Ahmetqyzy Tólegenova boldy. Ol ánshi, mýzykant, dırıjer Plasıdo Domıngonyń álemdik deńgeıdegi erekshe daryndy tulǵa ekenin atap ótti.
- «Operalııa» baıqaýynyń Qazaqstanda, elordamyzda ótkeni biz úshin úlken qurmet, orasan zor maqtanysh, - dedi Bıbigúl Tólegenova.
