«Týǵan jerge týyńdy tik» taqyrybyndaǵy jyr dodasyna Rınat Zaıytov, Jansaıa Mýsına, Rústem Qaıyrtaıuly, Qýanysh Sharmanov, Qalıjan Bildáshov, Muhtar Nııazov, Aspanbek Shuǵataev, Ásem Ereje, Maqsat Aqanov, Shuǵaıyp Sezimhan, Tólegen Jamanov syndy elimizdiń aqyndarynan bólek Mońǵolııa (Erlan Dáýletuly) men Qytaı (Jarqynbek Berdibekuly) memleketinen de aıtyskerler qatysty.
Halyqaralyq aıtystyń ashylý saltanatynda sóz alǵan Tarbaǵataı aýdanynyń ákimi Dildábek Orazbaev dúldúl aqyndardyń basyn qosqan sóz saıysynyń Elbasynyń «Rýhanı jańǵyrý: bolashaqqa baǵdar» maqalasynda kórsetilgen mindetterdi júzege asyrý aıasynda uıymdastyrylǵanyn, bul sharany osy óńirdiń týmalary Tastekeevter áýletiniń qarjylandyrǵanyn aıtty.
Júrsin Erman júrgizgen jyr dodasynda aqyndar týǵan jer, ósken elge qurmet, ulttyq dástúrlerimizdi ulyqtaý, ótkenimizdi umytpaý syndy ózekti taqyryptardy jan-jaqty qaýzap, kórermenniń ystyq yqylasyna bólendi. Uzyn sany 12 aqyn qatysqan óner básekesinde Aqsýattyń týmasy Rústem Qaıyrtaıuly babynda ekenin baıqatyp, bas júldeni (2 mln teńge) qanjyǵaǵa baılady. Birinshi oryndy Rınat Zaıytov (1 mln teńge), ekinshi oryndy Jansaıa Mýsına (750 000 teńge), úshinshi oryndy Qytaıdan kelgen qandasymyz Jarqynbek Berdibekuly (500 000 teńge) enshiledi. Muhtar Nııazov jáne Aspanbek Shuǵataev 300 000 teńgeniń arnaıy syılyǵyna ıe boldy. Bul aıtystyń ózge aıtystardan bir ereksheligi sol, eki aqyn Qalıjan Bildəsh pen Shuǵaıyp Sezimxanǵa100 000 teńgeden bir jyldyq stıpendııa taǵaıyndaldy.
Sonymen qatar osy shara aıasynda Barqytbeldiń baýraıyndaǵy Tarbaǵataı óńiriniń ótkeni men búgini týraly syr shertetin «Tarıhqa toly Tarbaǵataı» atty kitaptyń tusaýkeser rásimi ótti.
Azamat QASYM,
«Egemen Qazaqstan»
Shyǵys Qazaqstan oblysy
