Bul jarys burynǵydan ózgerek. Halyqaralyq deńgeıde ótken báıgege kásibıler men sportty súıikti isine aınaldyrǵan áýesqoılar bólek-bólek qatysty. Bul synǵa túskender sýda 1,9 shaqyrym júzip, 21 shaqyrym qashyqtyqty jaıaý júgirip, sondaı-aq, 90 shaqyrymdy shaıtanarbamen júrip ótti.
Mundaı aýqymdy sharany Mádenıet jáne sport mınıstrligi, Astana qalasynyń ákimdigi, Qazaqstan Trıatlon Federasııasy, Azııa Trıatlon Konfederasııasy (ASTC), Halyqaralyq Trıatlon Odaǵy (ITU) birigip uıymdastyrdy. Al jeńimpazdardy marapattaý úshin QR Premer-Mınıstri Baqytjan Saǵyntaev, Trıatlon federasııasynyń prezıdenti Kárim Másimov, Mádenıet jáne sport mınıstri Arystanbek Muhamedıuly, sondaı-aq, Astana qalasynyń ákimi Áset Isekeshev qatysty. Olar máre syzyǵyn kesken jeńimpazdar men qatysýshylardy qarsy alyp, jyly lebizderin bildirdi.
Kárim Másimov óz sózinde barlyq qatysýshylardy, uıymdastyrýshylardy, sondaı-aq jarystyń kórkin qyzdyrǵan jankúıerlerdiTrıatlon federasııasy atynan Qazaqstan Respýblıkasyndaǵy tuńǵysh ashyq chempıonattyń ashylýymen quttyqtady.
– Bul dúnıe júzine keńinen tanymal sport túri.Keshe dál osy jerde Halyqaralyq Trıatlon Odaǵynyń qoldaýymen Azııa Kýbogynyń irikteý kezeńin kórgenbiz. Jankúıerlerdiń ushqyn atqan janarynan sporttyń bul túrine degen qyzyǵýshylyqty birden baıqaýǵa bolady. Aldaǵy ýaqytta trıatlondy damytý úshin kelesi jylyIronman 70.3 jarysyn uıymdastyrýdy josparlap otyrmyz. Búgingi jarysqa qatysqan sportshylardyquttyqtaımyn! Olar keler jyldyń shildesinde Ironman 70.3 Astana jarysyna alǵash bolyp qatysa alady, – dedi Kárim Másimov.
Qazirgi tańda álem elderindegi sekildi bizde deAge Group, ıaǵnı áýesqoılar sanatyndaǵy sportshylardyń sany kúnnen kúnge artyp keledi.Oǵan osy jarysty mysalǵa keltirýge bolady. Uıymdastyrýshylardyń aıtýynsha, qatysýǵa 200-den astam adam nıet tanytqan eken, bul joly 155 adam tizimge ilikken. Kárim Másimov ilgeride aıtyp ótkendeı, bul jarys elimizde ótkizilse, Qazaqstannan da álemdik deńgeıge shyǵatyn sportshylarymyzdyń sany artar edi. Joǵary laýazymdy tulǵalardyń kópshiliktiń qyzyǵýshylyǵyn arttyryp, sporttyń osyndaı túrine den qoıýy men qoldaý kórsetýi qarapaıym jurtshylyqqa shabyt beretini anyq.
Chempıonatqa qatysýshylardyń arasyndaveloshabandoz, 2012 jylǵy London Olımpıadasynyń chempıony Aleksandr Vınokýrov ta boldy. Bul joly ol áýesqoılar arasynda baq synady. Ol 40-44 jas aralyǵyndaǵy synda máre syzyǵyn 4 saǵat 25 mınýtta kesip ótti. Onyń jurtshylyq arasyna kelip, qoıan qoltyq aralasa júrýi jarystyń mártebesin arttyra túskendeı. Bul synda
– Bas qalamyzda ótetetin osyndaı úlken jarys týraly estigennen keıin úıimde qarap otyra almadym. Shynymdy aıtsam, sporttan ketkendikten bolar, maǵan ońaıǵa soqpady. Alaıda velosıped ómirimniń bir bólshegine aınalyp ketken ǵoı, sondyqtan bul jaǵy maǵan jeńil boldy. Al eń aýyry tıgeni – júzý túri. Shamamen, birinshi bolyp jetken áriptesimnen jarty saǵatqa keshigip kelgen bolarmyn. Jarysta úzdik bolyp, birinshi oryndy alýdy maqsat etkenim joq. Tek óskeleń urpaqtyń sportqa degen qyzyǵýshylyǵyn arttyryp, az da bolsyn septigimdi tıgizsem, josparymnyń oryndalǵany bolar edi, – dedi London Olımpıadasynyń chempıony.
Kásibı sportshylar arasynda reseılik Ivan Týtýkın birinshi orynǵa ıe bolsa, kúmisti otandasymyz Maksım Krıat ıelendi. Al úzdik úshtikti Ýkraınadan kelgen Vıktor Zemsev qorytyndylady. Sonymen qatar, uıymdastyrýshylar áýesqoılar arasyndaǵy úzdikterdi túrli jas dárejelerine qaraı marapattady.
О́z kezeginde Maksım Krıat 2015 jyldan beri mundaı qashyqtyqta synǵa túspegendikten jarystyń qıyn bolǵanyn aıta kelip, ekinshi oryn alǵanyna qýanǵanyn málimdedi.
Aıta keteıik, 29 shilde kúni trıatlonnan erler men qyzdar arasynda Azııa Kýbogy ótti. Qatysýshylar sprınt araqashyqtyǵynda baq synady. Iаǵnı júzý – 750 metr, velojarys – 20 shaqyrym, júgirý – 5 shaqyrym. Mundaı aýqymdy jarysty elordamyzda ótkizý Halyqaralyq trıatlon odaǵy men Azııa trıatlon konfederasııasy arasynda ótken kelissózderi nátıjesinde sheshilgen bolatyn.
Salamatty ómir saltyn ustaný, aýyryp em izdegenshe, aýyrmaıtyn jol izdeý kóptegen damyǵan elderdiń halqy ustanatyn jol. Jyl ótken saıyn bizdiń el azamattary da ony dástúrge aınaldyryp keledi. Bılik bastap, halyq qostasa, aldymyzda áli talaı biz alatyn asý tur.
Aıan ÁBDÝÁLI,
«Egemen Qazaqstan»
Sýretterdi túsirgen
Orynbaı BALMURAT,
«Egemen Qazaqstan»
