Oblys ortalyǵy mańaıynda ornalasqan Jańaqonys aýylyndaǵy orta mektep úıi ábden tozyǵy jetip, eskirip qalǵan soń búgingi zamanǵa saı sáni men sáýleti kelisken 600 oryndyq syńǵyrlaǵan jańa mektep ǵımaraty boı kóteripti. Al bosap qalǵan burynǵy mektep úıi eski ári tar demeseńiz irgetasy myqty, kúrdeli jóndeý júrgizse áli de biraz jyl paıdalanýǵa turarlyqtaı eken. Osy máseleniń sheshimin Novyı aýyldyq okrýgi aqsaqaldar keńesiniń tóraǵasy Saǵynaı Qusaıynov usynypty. Ol tek usynys jasap qana qoımaı, eski mekteptiń búgingi urpaq múddesine qyzmet jasaýyna tikeleı bastamashy bola bilipti. Sóıtip el ishinde abyroı bedeli joǵary adamgershiligi men kisiligi mol Saǵynaı qajynyń qoldaýynyń nátıjesinde atalǵan nysan kúrdeli jóndeý júrgizilgen soń 523 jetkinshekti qabyldaı alatyn balalar shyǵarmashylyq úıine aınalypty. Eger Sákeń bul iske belsheshe kirispegende eski mektep talan-tarajǵa túsip, onyń materıaldary ustaǵannyń qolynda, tistegenniń aýzynda ketken bolar edi dedi aqsaqaldar. Qazirgi kúni qaıta jańǵyrtylǵan ǵımarat óziniń múmkindigin tolyq paıdalanyp otyrǵany da aqsaqaldardyń «Egemenge» kelýine túrtki bolypty.
Ortalyqta 28 úıirme jumys isteıdi eken. Shyǵarmashylyq úıinde balalardyń sabaqtan tys ýaqyttaryn tıimdi túrde ótkizýine, ónerdiń tilin taýyp, sportpen shuǵyldanýyna barlyq jaǵdaılar jasalypty. Bul ortalyq ashylyp iske kiriskennen keıin de Saǵynaı qajy olarmen baılanysty úzbepti. Kúres kilemin jáne avtobýs alyp berýge septigin tıgizipti. Búginde qurylǵanyna bir jyl tolyp otyrǵanyn shyǵarmashylyq úıiniń tárbıelenýshileri osy qysqa ýaqyt ishinde 28 respýblıkalyq jáne halyqaralyq júldelerge ıe bolypty.
Bilim salasy ardagerleriniń aıtýynsha, Saǵynaı qajynyń urpaq tárbıesine tıgizgen shapaǵaty tek bir shyǵarmashylyq úıimen shektelmeıdi. Buǵan deıingi ótpeli jyldardyń kúrdeli kezeńderinde Nurashasaı mektebiniń orta mektep mártebesine ıelenýine de yqpal jasapty. Bul úshin qajetti delingen barlyq jóndeý jumystaryn tikeleı ózi basqarypty. Osy arqyly 40 jumys orny ashylǵan. Ári árbir ustaz ben tárbıeshi jetkinshekterdi tárbıeleý sekildi súıikti isimen aınalysýlaryna múmkindik alypty.
«Saǵynaı Qusaıynov adamdarǵa tek jaqsylyq jasaý úshin jaratylǵan jan. Ol talaı adamdardyń saýabyn aldy. Qamyqqandy jubatty. «Janam degen júrekterge ot berdi», «Jaqsynyń jaqsylyǵyn aıt – nury tasysyn» degendeı biz «Egemenge» el úshin eńbektenýden tanbaıtyn Sákeńniń, Saǵynaı qajynyń úlken júregi týraly aıtý úshin kelip otyrmyz. Biz osyndaı abzal da asyl azamattyń esimi «Egemenniń» betinen kórinis tapqanyn qalaımyz», dedi olar attanar sátte.
Biz de aqsaqaldardyń tilegin gazetimizge joldaǵandy jón kórdik.
Temir QUSAIYN,
«Egemen Qazaqstan»
Aqtóbe oblysy
