El men eldiń baılanysyn bekemdeýge baǵyttalǵan mundaı bastamalarǵa Memlekettik ortalyq mýzeıi udaıy uıytqy bolyp júrgeni aıan.
Bul kórmeniń mánisi mynada. Absolıýtti monarhııalyq basqarý júıesin ustanatyn Saýd Arabııasy tarıhynyń jarqyn tustarynan syr shertetin kórmede Saýd Arabııasynyń úshinshi koroli Feısal ıbn Abdýl-Ázız Ál Saýdtyń (1906-1975 jj.) tutynǵan jeke zattary men oǵan qatysty muraǵattyq qujattar qoıyldy.
1964-1975 jyldary bılik qurǵan Feısal ıbn Abdýl-Ázız Ál Saýd «Saýdıtter» áýletinen shyqqan. Saýdıtter áýleti shamamen 1446 jyldan bastaý alady. Qazirgi tańda eldegi absolıýtti bılikke ıe jalǵyz otbasy, al Saýd Arabııasy áýlet atymen atalatyn álemdegi úsh eldiń biri (basqalary – Lıhtenshteın jáne Iordanııa).
Korol Feısaldyń bıligi júrgen dáýirdiń murasy ulan-ǵaıyr: jahandanýǵa baǵyttalǵan aýqymdy reformalardy júrgizýdiń nátıjesinde Saýd Arabııasynyń qoǵamy túbegeıli ózgergeni belgili. Elde josparlaý júıesi bekitildi, sol kezde qabyldanǵan salmaqty zańdarǵa Saýd úkimeti búginde de jańa zań jobalaryn daıyndaýda ıek artady. Feısal ıbn Abdýl-Ázız Ál Saýd óz elinde birqatar aýqymdy saıası jáne ekonomıkalyq reformalardy tabysty júzege asyryp, eldiń áleýetin arttyrýda úlken is tyndyrǵan kemel basshy, uly mártebeli korol boldy. Osyndaı daryndy basshy, dara tulǵanyń eli úshin tyndyrǵan árbir isi halyqaralyq deńgeıde tereń tanyp bilýge, zerttep zerdeleýge ábden laıyq.
Kórme Mádenıet jáne sport mınıstrliginiń qoldaýymen Korol Feısal atyndaǵy Islamdyq zertteýler ortalyǵymen birlese uıymdastyryldy.
Kórme eki el arasyndaǵy saıası-ekonomıkalyq yqpaldastyqty nyǵaıtýǵa, mádenı yntymaqtastyqty qalyptastyrýǵa baǵyttalǵan.
Aınash ESALI,
«Egemen Qazaqstan»
ALMATY
