Kórme jumysynyń alǵashqy aptasynda kúnine 23 myń adam kelgeni esimizde. Al 10 maýsymnan 30 shildege deıingi on kún ishinde shara kórermenderiniń sany 1 794 132 adamdy qurady. Buǵan deıin halyqaralyq mamandandyrylǵan EKSPO-2017 kórmesine kelýshiler sany – 2 000 000, al kirip-shyǵý kórsetkishi shamamen 5 000 000 bolady dep boljanǵan edi.
Esepti kezeńde kórme kesheniniń eń kóp tamashalanǵan nysandarynyń kóshin taǵy da «Nur álem» pavılony bastap tur. Ekinshi orynda – kommersııalyq pavılondar, úshinshi – «Shell» balalar zerthanasy, tórtinshi – Balalar parki. Bestikti taqyryptyq S3.5 pavılony túıindeıdi. «Dıý Soleı sırkiniń» ǵımaraty – altynshy orynda. Amfıteatr, taqyryptyq S 2.4 pavılony, shyǵarmashylyq energııa aımaǵy jáne ART-ortalyq alǵashqy ondyqqa kiredi.
Kelýshiler eń kóp tamashalaǵan pavılondardyń qatarynda eń aldymen «Afrıka plazasy» aýyzǵa iligedi. Ekinshi – Úndistan, úshinshi – Egıpet, tórtinshi – Túrkııa, besinshi Reseı pavılondary tur. Taıland, Japonııa, О́zbekstan, Ázerbaıjan, Saýd Arabııasy Koroldigi pavılondary kelesi bestikti ret-retimen enshileıdi.
Bıoóndiriske 45 mıllıon eýro bólmek
Italııanyń «Bıonet EsErEl» kompanııasy elimizde ashylatyn bıoóndiriske 45 mıllıon eýro kóleminde ınvestısııa salady. EKSPO-2017 halyqaralyq kórmesiniń keńsesinde eki jaq kelisimge kelip, qujattarǵa qol qoıyldy.
Shara barysynda Italııa pavılonynda «Bıonet» kompanııasynyń ónimderi kórsetilip, «Bolashaq energııasymen» úndesetin jańa bas-
tamalarynyń tusaýy kesildi. Bul ujym osyǵan deıin bıoorganıkalyq qaldyqtardy óńdeı otyryp, jańa balamaly qýat kózin óndirgen. Endi osy jobany olar bizdiń elde uıymdastyrýdy kózdep otyr.
«Biz qazir zaýyttyń ornyn anyqtaýymyz kerek. Sodan keıin basqarýshy kompanııalarmen kelissózder júredi. Al sońǵy jyldary bul kompanııa 10 joba jasaǵan. Qazir sonyń úsheýimen jumys isteýde. Sondyqtan, ıtalııalyqtarǵa senim artýǵa bolady», deıdi «KAZNEX INVEST» UK tóraǵasynyń orynbasary Nursultan Jıenbaev.
«Aspan koroldigi» – Astanada
EKSPO-2017 halyqaralyq kórmesi tórinde Lesoto Koroldiginiń ulttyq kúni merekelendi. Álemge «Aspan koroldigi» degen atpen belgili el Afrıkanyń Basýto ústirtinde ornalasqan. Munda almas, jún, bıdaı men kókónis eksporty damyǵan. Lesoto álemde almas óndirýden 9-orynda tur.
.jpg-31-07.jpg)
Saltanatty jıynda Aqparat jáne kommýnıkasııalar mınıstriniń orynbasary Qaırat Balyqbaev sóz sóıledi. «Lesoto – Afrıkadaǵy taýly aımaqta ornalasqan jalǵyz memleket. Týrıster munda ásem taýly shatqaldary men kóz súrindirgen sarqyramalaryn kórýge barady. Bul eldiń balyq aýlaý ádisi de álem halqynyń nazaryn aýdartyp otyr», dedi ol.
Lesotonyń saýda jáne ónerkásip mınıstri Tefo Mapasela memlekettiń EKSPO-2017 halyqaralyq mamandandyrylǵan kórmesine qatysýyna múmkindik bergen Qazaqstanǵa shynaıy rızashylyǵyn bildirdi. «Bizge kórsetilgen materıaldyq-tehnıkalyq qoldaýdyń arqasynda álem halyqtaryna energetıkalyq sektordaǵy ınnovasııalyq múmkindikterimizdi, sonymen qatar, «Aspan koroldiginiń» ádemiligi men kórikti oryndaryn kórsetýdemiz», dedi óz kezeginde Tefo Mapasela.
Lesoto ókili EKSPO qonaqtaryn eline týrıstik saparmen kelýge shaqyrdy. «Sizder onda bes juldyzdy qonaq úıge nemese týrısterge arnalǵan jaılarǵa ornalasa alasyzdar. Bazoto – áserli tabıǵı kórinisterimen jáne mádenı muralarymen tanymal. Ol jaqta atpen serýendeýge, qustardy baqylap, balyq aýlaýǵa, shańǵymen syrǵanap, taýly aımaqtarǵa qydyrýǵa bolady», degen afrıkalyq meıman qazirgi ýaqytta Lesoto taý-ken qazba ónerkásibinde almas óndirýden 7-orynǵa kóterilýdi maqsat tutqanyn aıtty. «Biz álemde joǵary baǵalanatyn úzdik, eń úlken, sapaly almastardyń birin óndiremiz. Lesotoda óndirilgen almastardyń irileri de bar. Qazirgi tańda «Lesoto ýádesi» – 603 karatty, «Braýn Lesoto» – 601 karatty, «Lesoto murasy» – 493 karatty jáne «Leselı la Leseng» 478 karatty quraıdy. Lesoto jaqutynyń 1 karaty shamamen 2 500 dollarǵa teń», dedi Tefo Mapasela.
Lesoto ulttyq kúniniń resmı ashylý rásiminen keıin afrıkalyq ártister baıannyń súıemeldeýimen án salyp, ózderiniń ulttyq bılerin bıledi.
Toptamany ázirlegen
Ashat RAIQUL,
«Egemen Qazaqstan»
Sýretterdi túsirgender
Orynbaı Balmurat,
Erlan Omar,
«Egemen Qazaqstan»
