Bilim jáne ǵylym mınıstrligi Balalardyń quqyn qorǵaý komıteti ádette jańa oqý jylynyń bastalýyna bir aı qalǵanda «Mektepke jol» jalpyrespýblıkalyq qaıyrymdylyq aksııasyn ótkizedi. Bıylǵy aksııa 1 tamyzdan 30 qyrkúıekke deıin «Meniń tańdaýym – balalarǵa kómek kórsetý!» uranymen ótedi. Eki aı boıy júrgiziletin aýqymdy sharanyń maqsaty – áleýmettik jaǵdaıy tómen otbasylar men qaraýsyz qalǵan balalardy mektepke daıyndap, qajetti qural-jabdyqtaryn alyp berý.
Ortalyq kommýnıkasııalar qyzmetinde ótken brıfıngte Bilim jáne ǵylym mınıstrligi Balalardyń quqyn qorǵaý komıteti tóraǵasynyń orynbasary Mánshúk Ábdikárim jyldan jylǵa aksııanyń aýqymy keńeıip, turaqty demeýshiler men mesenattardyń qatary artqanyn jetkizdi. Byltyr 320 myń balaǵa jalpy somasy 2 mlrd 468 mln teńgeniń kómegi kórsetilipti. Kómekke muqtaj balalarǵa kómektesý jaǵynan Jambyl, Qaraǵandy, Qyzylorda, Aqtóbe oblystary kósh bastaǵan. Bul óńirlerde 30 myńnan astam bala «Mektepke jol» aksııasyna qatysyp, mektepke qajetti kerek-jaraqtarmen qamtamasyz etilipti. Al aksııa aıasynda qarjy tartý jaǵynan Almaty, Qaraǵandy, Jambyl, Ońtústik Qazaqstan oblystary aldyńǵy lekten kóringen. Ár óńir shamamen 500 mln teńgeden astam qarajat tartyp, kómekke zárý jetkinshekterge mektep quraldaryn alyp bergen.
Mánshúk Ábdikárimniń aıtýynsha, bıylǵy aksııa barysynda oqýshylardyń jappaı mektepke barýyna aıryqsha kóńil bólinbek. Byltyr kóringen jerde túnep, qaraýsyz qalǵan 280 bala anyqtalǵan eken. Bıyl osyndaı áleýmettik sebepke baılanysty sabaqtan qalý jaǵdaılaryn boldyrmaý úshin reıdtik sharalar uıymdastyrylatyn bolady. Tıisti mamandar páterlerdi, saıajaılardy aralap, ata-anasynyń baqylaýynsyz qalǵan balalardy izdestiredi.
Álbette, balalardyń qýanyshy – qýanyshtardyń tóresi. Jaǵdaıy tómen otbasylardyń balalaryna kómektesip, saýap alǵanǵa ne jetsin?! Biraq jylt etken jaqsylyǵyn jurtqa jarııalap, sonyń esebinen ózine jarnama jasaǵysy kelip turatyn adamdar da joq emes. Byltyr osy aksııa aıasyndaǵy qaıyrymdylyǵyn jarııaly túrde jasaımyn dep, balalar men ata-analardyń namysyna tıip ketken oqıǵalar bolǵany esimizde. Osydan sabaq alǵan mınıstrlik ókilderi endi qaıyrymdylyq kómek eshqandaı saltanatty túrde nemese mekteptegi sap túzeýde tapsyrylmaý jóninde óńirlerge nusqaý hat joldapty.
Negizi, «Mektepke jol» aksııasyna kez kelgen jaǵdaıy joq otbasylar qatysyp, kómek ala alady. Ol úshin 8-7172-74-25-28 nómirli jedel jelige habarlasýy kerek. Al áleýmettik ahýaly tómen otbasylarǵa kómektesemin degen aq nıetti azamattar bolsa, 8-7172-74-21-40 telefonyna habarlasyp, qol ushyn berýge bolady.
Brıfıngte elimizdegi mektepterdiń jańa oqý jylyna daıyndyq barysy, mektebi joq aýyldyń balalaryn ortalyqtarǵa tasymaldaý máselesi de aıtyldy. Mınıstrliktiń mektepke deıingi jáne orta bilim departamentiniń dırektory Zeınep Maqsutovanyń málimetinshe, respýblıka boıynsha bıyl 369 myń bala birinshi synypqa barady dep josparlanýda. Jańa oqý jylyna mektepterdiń materıaldyq-tehnıkalyq bazasy da, kadrlar quramy da daıyn. Búginde barlyǵy 325 myń pedagog bolsa, 1 qyrkúıekte 10 myńǵa jýyq jas maman mektepterge jumysqa qabyldanbaq.
Jalpy, bıylǵy 27 shildedegi kórsetkish boıynsha, 46 mektep jabylsa, esesine 16 jalpy bilim beretin mekeme ashylǵan. Jańa oqý jylynda elimiz boıynsha 75 jańa mektep iske qosylady dep kútilýde.
Búginde 22 myń 278 oqýshy avtobýspen mektepke tasymaldanady. Osy maqsatta 768 avtobýs daıyn tur eken. Onyń 42 paıyzy sońǵy bes jylda jańartylsa, byltyr 23 jańa avtobýs satyp alynypty.
Qymbat TOQTAMURAT,
«Egemen Qazaqstan»
